ޙުސައިން ޢަބްދުލްޤާދިރު ވ. ރިފާސް ޙުސައިން

މާމެންދޫ މެޖިސްޓްރޭޓް ކޯޓުން އެއްބަސްވުމަކީ ޞައްޙަ އެއްބަސްވުމެއްކަމަށް ކަނޑައަޅައި، ދޯނި ތަކެތީގެ ސަމެތު 24 ގަޑިއިރުތެރޭ ދަރިފުޅާ ހަވާލުކުރުމަށް ޙުކުމްކުރިއެވެ.

ބައްޕަ ސްޓްރޯކް ޖެހި ދަރިފުޅުގެ ބެލުމުގެ ދަށުން ފަރުވާ ހޯދަމުން މާލޭގައި ހުއްޓާ، 23 ޑިސެމްބަރު 2014 ގައި ބައްޕަގެ ނަމުގައިވާ ދޯނި 4،400،000 ރުފިޔާއަށް ދަރިފުޅަށް ވިއްކުމަށް އެއްބަސްވުމެއް ވެވުނެވެ. އަގުގެ ބައެއް ދަރިފުޅު ކުރި މަރާމާތުގެ ޚަރަދާއި ބާކީ އަގު ދޯނި ރަހުނުކޮށް ނެގި ލޯނުގެ ފައިސާގެ ގޮތުގައި ކަމަށް ބަޔާންކޮށްފައިވިއެވެ.

ބައްޕަގެ ފަރާތުން ބުނީ މަސައްލައިގައި 2016/HC-S-A/40 ގައި ނިޔާ ކަނޑައަޅާފައިވާތީ ރެސް ޖުޑިކާޓާއާ ޚިލާފުކަމަށާއި، އެއްބަސްވުން ވެފައިވަނީ ނުރަނގަޅު ނުފޫޒު ފޯރުވައިގެންކަމަށާއި، ސުލްޙަގެ ފުރުޞަތު ނުދިންކަމަށާއި، ދޯނީގެ ތަކެތި ހަވާލުކުރަން ޙުކުމްކުރީ އޭގެ ވާހަކަ ނުދައްކައިކަމަށެވެ.

ބައްޕައާއި ދަރިފުޅާ ދެމެދު ބައްޕަގެ ނަމުގައިވާ ދޯނި ވިއްކުމަށް ވެފައިވާ އެއްބަސްވުމަކީ ޞައްޙަ އެއްބަސްވުމެއްތޯ، ނުވަތަ ކޮންޓްރެކްޓާބެހޭ ޤާނޫނުގެ 15 ވަނަ މާއްދާގައިވާ ނުރަނގަޅު ނުފޫޒު ފޯރުވައިގެން ވެފައިވާތީ ބާޠިލު އެއްބަސްވުމެއްތޯ.

ދަށުކޯޓުގެ ޙުކުމް ބާޠިލު

ދެފަރާތަކީ ބަފައިން ކަމަށާއި، ބަލިވެ ފަރުވާ ހޯދަމުންދިޔަ ބައްޕަގެ ކަންކަން ބެލީ ދަރިފުޅުކަމަށާއި، އެއްބަސްވުމުން ބައްޕައަށް އެއްވެސް މާލީ މަންފާއެއް ނުލިބޭތީ، ނުރަނގަޅު ނުފޫޒު ފޯރުވައިގެން ވެފައިވާ ބާޠިލު އެއްބަސްވުމެއްކަމަށް ކޯޓުން ކަނޑައަޅައި، ޚަރަދުތަކަށް ވަކި ދަޢުވާއެއް ކުރެވިދާނެކަމަށް ބުނެފައިވެއެވެ.