ޙަބީބް ޒާހިރު ވ. މާލޭ ސިޓީ ކައުންސިލް

ސިވިލް ކޯޓުން ނިންމީ، މުސްތަޤުބަލުގައި ލިބިދާނެ ކަމަށް ބުނާ އާމްދަނީގެ މައްޗަށް ބަދަލު ނަގައިދެވޭނެ ހަމައެއް ނެތުމާއި މުސާރައާއި ކުލި ޘާބިތުނުވާތީ، އެދުނު ބަދަލު ނަގައިނުދެވޭނެ ކަމަށެވެ.

އިސްތިއުނާފުކުރި ފަރާތް މާލޭގެ މަގުތަކުގައި 3 ބައިސްކަލުގައި އައިސްކްރީމް ވިއްކަމުން ދަނިކޮށް، 21 ޖުލައި 2011 ގައި މާލޭ ސިޓީ ކައުންސިލުން އެ މަސައްކަތް ހުއްޓުވިއެވެ. އެ ހުއްޓުވުމަކީ ޤާނޫނާ ޚިލާފު ކަމެއްކަމަށް ކުރިން ކަނޑައެޅިފައިވާއިރު، 217 ދުވަހުގެ އާމްދަނީ، މުސާރަ އަދި ކުލީގެ ގޮތުގައި 1,189,882.61 ރުފިޔާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ހެކި ވަޒަންކުރުމުގައި ޢާންމު އުޞޫލުތަކާ ޚިލާފުވެ، ކަންހިނގި ގޮތާ ޚިލާފު ނުކުތާތައް ފާހަގަކޮށް، ކުރިން ކުރެވިފައިވާ ޙުކުމްތަކާ ޚިލާފަށް ހުއްޓުވުމަކީ ޤާނޫނީ އިމުގެ ތެރެއިން ކުރި ކަމެއްކަމަށް ސިވިލް ކޯޓުން ފާހަގަކުރި ކަމަށެވެ.

މާލޭ ސިޓީ ކައުންސިލުން ޤާނޫނީ ބާރެއް ނެތި އައިސްކްރީމް ވިއްކުމުގެ މަސައްކަތް ހުއްޓުވުމުގެ ސަބަބުން އިސްތިއުނާފުކުރި ފަރާތަށް ލިބުނު ގެއްލުމުގެ ބަދަލު ނަގައިދެވޭނެ ހަމައެއް ނެތްކަމަށް ސިވިލް ކޯޓުން ނިންމި ނިންމުން ޞައްޙަތޯ، އަދި ބަދަލު ނަގައިދެވޭނަމަ އޭގެ މިންވަރު ކަނޑައަޅަންވީ ގޮތް.

ދަށުކޯޓުގެ ޙުކުމް ބާޠިލުކޮށް، 405,000 ރުފިޔާ ބަދަލު ނަގައިދިނުމަށް ޙުކުމްކުރި

ހުއްޓުވުމުގެ ޤާނޫނީ ޞައްޙަކަން ކުރިން ފައިޞަލާވެފައިވާތީ ބަލަންޖެހޭނީ ގެއްލުމާއި މިންވަރު ކަމަށާއި، މުސާރައާއި ކުލި ޘާބިތުނުވިނަމަވެސް ވިއްކުމުގެ ޝީޓްތަކުން ދުވާލަކަށް 4,500 ރުފިޔާ ލިބުނުކަން އެނގޭތީ، އެ ރޭޓުން 90 ދުވަހުގެ ބަދަލު އެކަށީގެންވާ އަދުލުވެރި މިންވަރު ކަމަށް ކޯޓުން ނިންމިއެވެ.