ޒަރީނާ ޢަލީ ވ. ނަާޒާކީ ސަރވިސަސް ޕްރައިވެޓް ލިމިޓެޑް

ސިވިލް ކޯޓުން، ޚަރަދުގެ ބަދަލުގެ ގޮތުގައި 450,000 ރުފިޔާ ދިނުމަށް އިސްތިއުނާފުކުރި ފަރާތް ކުރިން އެއްބަސްވެފައިވާތީ އެ ޢަދަދު ކުންފުނިން ހޯދަންޖެހޭ ޢަދަދު ކަމަށް ކަނޑައަޅައި، ކޮންމެ މަހަކު މަދުވެގެން 5,000 ރުފިޔާ ދައްކައި ޚަލާޞްކުރުމަށް ޙުކުމްކުރި. އިސްތިއުނާފުކުރި ފަރާތުގެ ކައުންޓަރ ކްލެއިމާމެދު ގޮތެއް ނުނިންމި.

ދެފަރާތުގެ ދެމެދު ވެފައިވާ އެއްބަސްވުމެއްގެ ދަށުން ޢިމާރާތެއް ހެދުމުގެ މުޢާމަލާތު ނިމުމަކަށް އައުމާ ގުޅިގެން، ކުންފުނިން ކޮށްފައިވާ ޚަރަދު އިސްތިއުނާފުކުރި ފަރާތުގެ ކިބައިން ހޯދުމަށް ކުންފުނިން ދަޢުވާކުރި. މީގެ ކުރިން 2008/HC-A/197 ޤަޟިއްޔާގައި ހައިކޯޓުން ބަޔާންކޮށްފައިވަނީ، މި ޚަރަދާބެހޭ މައްސަލައަކީ ދަޢުވާކޮށްފިނަމަ ދަށުކޯޓުން ބަލައި ނިޔާއެއް ކަނޑައަޅަންޖެހޭ މައްސަލައެއް ކަމަށެވެ.

އިސްތިއުނާފުކުރި ފަރާތުން ބުނީ، ދަށުކޯޓުން މައްސަލަ ނިންމާފައިވަނީ 2008/HC-A/197 ޤަޟިއްޔާގައި ހައިކޯޓުން ފާހަގަކުރި ނުކުތާގެ މަފްހޫމާ ޚިލާފަށް ކަމަށާއި، މުޢާމަލާތާ ގުޅިގެން އޭނާއަށް ލިބުނު ގެއްލުމުގެ ބަދަލު ހޯދުމަށް ހުށަހެޅި ކައުންޓަރ ކްލެއިމް ސަބަބެއް ނުބުނެ ބައްލަވައިދެއްވާފައި ނުވާ ކަމަށެވެ.

ޢިމާރާތް ހެދުމުގެ އެއްބަސްވުމެއް ނިމުމަކަށް އައުމާ ގުޅިގެން ކޮށްފައިވާ ޚަރަދު ހޯދުމަށް ކުރި ދަޢުވާގައި، އަނެއް ފަރާތުން ހުށަހެޅި ކައުންޓަރ ކްލެއިމާމެދު ގޮތެއް ނުނިންމައި ދަށުކޯޓުން ޙުކުމްކުރުމަކީ ޙުކުމަށް ބަދަލު ގެންނަންޖެހޭ ސަބަބެއްތޯ؛ އަދި ދަށުކޯޓުން މައްސަލަ ނިންމާފައިވަނީ 2008/HC-A/197 ޤަޟިއްޔާގައި ހައިކޯޓުން ފާހަގަކުރި ނުކުތާގެ މަފްހޫމާ ޚިލާފަށްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހައިކޯޓުން ދެކުނީ، 2008/HC-A/197 ގައި ޚަރަދާބެހޭ މައްސަލަ ބެލުމަށް ބުނެފައިވުމަކީ އަނެއް ފަރާތަށް ލިބުނު ގެއްލުމުގެ ބަދަލު މިންކުރުމަށް ހުރަހެއް ނޫން ކަމަށާއި، ކައުންޓަރ ކްލެއިމާމެދު ގޮތެއް ނުނިންމުމުން އިސްތިއުނާފުކުރި ފަރާތަށް ލިބުނު ގެއްލުމުގެ ބަދަލު ހޯދުމަށް ވަކި މައްސަލައެއްގެ ގޮތުގައި ދަޢުވާކުރުމުގެ ޙައްޤު ގެއްލިގެން ނުދާތީ، ޙުކުމަށް ބަދަލު ގެންނަންޖެހޭ ސަބަބެއް ނެތް ކަމަށެވެ.