ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑް ވ. މުޙައްމަދު ޙާޝިރު

ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ޤާއިމްނުކުރާތީ ޤާނޫނާ ޚިލާފު ވަކިކުރުމެއްކަމަށް ކަނޑައަޅައި، 29 (ހ) (1) ގެ ދަށުން ވަޒީފާއަށް އަނބުރާ ރުޖޫޢަކޮށް ވަކިކުރި ދުވަހުން ފެށިގެން މުސާރައާއި ޢިނާޔަތްތައް ދިނުމަށް ޓްރައިބިއުނަލުން ނިންމި.

ތެޔޮ ސަޕްލައިކުރާ ކުންފުންޏެއްގެ ބާޖެއްގައި ކްރޫއެއްގެ ގޮތުގައި ވަޒީފާ އަދާކުރި މީހަކު، ރިސޯޓަކަށް 60,000 ލީޓަރު ތެޔޮ ޑެލިވަރީކުރިއިރު ގާތްގަނޑަކަށް 8,000 ލީޓަރު ތެޔޮ މަދުވި މައްސަލައެއްގައި ބަޔާނެއް ނަގައި، ބާޖުގެ ކެޕްޓަނާއި ފަޅުވެރިންނާއެކު ނޯޓިސް ނުދީ ވަޒީފާއިން ވަކިކުރިއެވެ.

ކުންފުނީގެ ބަހުސަކީ ޓްރައިބިއުނަލުން ބޮޑަށް ބުރަވެވޭ މިންގަނޑަށްވުރެ ހަރުކަށި މިންގަނޑެއް ތަޠުބީޤުކުރިކަމާއި، ތުހުމަތު އަންގައި ޖަވާބުދާރީވުމުގެ ފުރުޞަތު ދީފައިވާކަމާއި، އިތުބާރު ގެއްލިފައިވާއިރު ވަޒީފާއަށް ރުޖޫޢަކުރުމާއި ބަދަލުގެ މިންވަރު މަތީ ކޯޓުތަކުގެ ނިންމުންތަކާ ޚިލާފުކަމެވެ. މުވައްޒަފުގެ ބަހުސަކީ ޑެލިވަރީގެ ޒިންމާތައް އޮތީ ކެޕްޓަނަށްކަމާއި، ކެޕްޓަންގެ އިރުޝާދަށް ތަބާވިކަމެވެ.

ތެޔޮ ޑެލިވަރީއެއްގައި ތެޔޮ މަދުވި މައްސަލައެއްގައި ނޯޓިސް ނުދީ ވަޒީފާއިން ވަކިކުރި ބާޖު ކްރޫއެއްގެ މައްސަލައިގައި، ވަކިކުރުމަށް އެކަށީގެންވާ ސަބަބެއް އޮތްތޯ ބެލުމުގައި ޓްރައިބިއުނަލުން ތަޠުބީޤުކުރި މިންގަނޑަކީ ޞައްޙަ މިންގަނޑެއްތޯއާއި، ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ޤާއިމްކޮށްފައިވޭތޯ.

ޓްރައިބިއުނަލުގެ ނިންމުން ބާޠިލު؛ ވަޒީފާއަށް އަނބުރާ ރުޖޫޢަކުރުމާއި މުސާރަ ދިނުމުގެ އަމުރު ބާޠިލު

ޑެލިވަރީ ނޯޓުތަކާއި ވެރިފިކޭޝަން ފޯމާއި ތަޙްޤީޤު ރިޕޯޓަށް ބަލާއިރު، ތެޔޮ މަދުވެ އެކަން ބާޖުގެ ތިން މީހުންކުރެ އެކަކުވެސް ނާންގާކަން ބޮޑަށް ބުރަވެވޭ މިންގަނޑުން ސާބިތުވާތީ، ވަކިކުރުމަކީ 23 (ށ) (2) ގެ ބާވަތުގެ އެކަށީގެންވާ ސަބަބަކަށްވާތީއާއި، ތުހުމަތު އަންގައި ބަޔާން ނަގައި ސަބަބާއެކު ނޯޓިސް ދީފައިވާތީ އިޖުރާއީ ޢަދުލުވެރިކަން ޤާއިމުވާތީ، ޓްރައިބިއުނަލުގެ ނިންމުން ބާޠިލުކުރި.