ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑް ވ. އަހްމަދު އަސްލަމް

ޓްރައިބިއުނަލުން ނިންމީ ވަކިކުރުމުގައި މައުޟޫޢީ އަދުލުވެރިކަން ޤާއިމުވެފައިވާ ނަމަވެސް، ތަހުޤީޤު ރިޕޯޓެއް ނެތީތީ އިޖުރާއީ އަދުލުވެރިކަން ޤާއިމުނުވާކަމަށާއި، 87 (ށ) ގެ ދަށުން ދެ މަހުގެ މުސާރައާއި އިނާޔަތްތައް (17,660 ރުފިޔާ) ނަގައިދިނުމަށެވެ.

ބާޖު ކެޕްޓަނަކު ސަފާރީއަކަށް ތެޔޮ އަޅާއިރު 2500 ލީޓަރު މަދުވިކަމަށް ކަސްޓަމަރު ޝަކުވާކުރުމުން، ކުންފުނިން އޭނާގެ ބަޔާން ނަގައި، ވަޒީފާގެ މަސްއޫލިއްޔަތުން ދުރުކޮށް، ފަހުން ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުން ނޯޓިސް ނުދީ ވަޒީފާއިން ވަކިކުރިއެވެ.

ކުންފުނިން ބުނީ ތުހުމަތު އަންގައި ބަޔާން ނަގައި ޖަވާބުދާރީވުމުގެ ފުރުޞަތު ދީ އިދާރީ ތަހުޤީޤެއް ހިންގިކަމަށާއި، ޓްރައިބިއުނަލުން ހެކިތަކަށް ރިޢާޔަތް ނުކުރިކަމަށެވެ. މުވައްޒަފު ބުނީ ޓްރައިބިއުނަލުން ނިންމި ގޮތަށް ނިންމަން އެދޭކަމަށެވެ.

ތަހުޤީޤު ރިޕޯޓެއް ތައްޔާރުކޮށްފައި ނެތުމުން، މުވައްޒަފު ވަޒީފާއިން ވަކިކުރުމުގައި އިޖުރާއީ އަދުލުވެރިކަން ޤާއިމުކޮށްފައިނުވާކަމަށް ވަޒީފާއާބެހޭ ޓްރައިބިއުނަލުން ނިންމައި، ދެ މަހުގެ މުސާރަ ބަދަލުގެ ގޮތުގައި ނަގައިދިނުމަށް ނިންމީ ރަނގަޅަށްތޯ.

ޓްރައިބިއުނަލްގެ ނިންމުމާއި ބަދަލު ނަގައިދިނުމަށް ކުރި ނިންމުން ބާޠިލު

މުވައްޒަފުގެ ބަޔާނާއި 14 ޖުލައި 2020 ގެ ސިޓީއިން ތަހުޤީޤެއް ހިންގިކަމާއި ތުހުމަތު އަންގައި ޖަވާބުދާރީވުމުގެ ފުރުޞަތު ދީފައިވާކަން އެނގޭތީ، ތަހުޤީޤު ރިޕޯޓެއް ނެތުމަކީ އިޖުރާއީ އަދުލުވެރިކަން ޤާއިމުނުވިކަމަށް ބުނެވޭނެ ސަބަބެއް ނޫނެވެ.