ޑރ. މުޙައްމަދު އިސްމާޢީލް ވ. ފާޠިމަތު ސައްލާމާ

ހުޅުމާލެ މެޖިސްޓްރޭޓް ކޯޓުން 'ވަގުތީ އަމުރު' ގެ ނަމުގައި، ބައްޕަ ދިރިއުޅޭ ގެއަށް ވަދެ ކުދިންނާއި ކުދިންގެ ޟަރޫރީ ތަކެތި މަންމައާ ޙަވާލުކުރުމަށް ފުލުހުންނަށް އަމުރުކުރިއެވެ.

ޙަޟާނަތުގެ ދެ ޤަޟިއްޔާއިން ދެކުދިން މަންމައާ ޙަވާލުކުރުމަށް ބައްޕައަށް އަންގައި މެޖިސްޓްރޭޓް ކޯޓުން ޙުކުމްކުރިއެވެ. ބައްޕަ އެ ޙުކުމާ އެއްގޮތަށް ޢަމަލުނުކުރުމުން، ފުލުހުން މެދުވެރިކޮށް ކުދިން ޙަވާލުކޮށްދިނުމަށް މަންމަ ހުށަހެޅިއެވެ؛ ކޯޓުން ދިން އިރުޝާދުގެ މަތިން އެ ހުށަހެޅީ ވަގުތީ އަމުރުގެ ފޯމުންނެވެ.

ބައްޕަ ބުނީ ޙަޟާނަތުގެ ޙުކުމްތައް ހައިކޯޓަށް އިސްތިއުނާފުކުރެވިފައިވާއިރު 2011/SC-SJ/04 އާއި 2014/HC-A/217 ގެ ދަށުން ތަންފީޛު ފަސްކުރަންޖެހޭކަމަށާއި، މައުޟޫޢީ ދަޢުވާއެއް ނެތި ވަގުތީ އަމުރު ނެރުމަކީ 2014/HC-A/106 އާ ޚިލާފު ކަމެއްކަމަށެވެ.

ޙަޟާނަތުގެ ޙުކުމްތަކެއް ހައިކޯޓަށް އިސްތިއުނާފުކުރެވިފައިވާއިރު، އެ ޙުކުމްތައް ފުލުހުން މެދުވެރިކޮށް ތަންފީޛުކުރުމަށް 'ވަގުތީ އަމުރު' ގެ ނަމުގައި މެޖިސްޓްރޭޓް ކޯޓުން އަމުރެއް ނެރުމަކީ ޞައްޙަ ކަމެއްތޯ؛ އަދި މައުޟޫޢީ ދަޢުވާއެއް ނެތި ވަގުތީ އަމުރު ނުނެރޭނެ އުޞޫލު މިއަށް ތަޠުބީޤުވޭތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

ބުނެވުނު ސަބަބުތަކަކީ މަދަނީ މުޢާމަލާތުގެ ނިންމުންތަކެއް ކަމުން ޙަޟާނަތަށް ތަޠުބީޤު ނުވާކަމާއި، އަމުރަކީ ނަމުން ވަގުތީ އަމުރެއް ކަމުގައި ވިޔަސް ޙަޤީޤަތުގައި ޙުކުމް ތަންފީޛުކުރުމުގެ ނިންމުމެއް ކަމާއި، ކޯޓުގެ ފޯމުގެ ކުށަކުން މަޢުޞޫމް ފަރާތަކަށް ގެއްލުމެއް ނުލިބެންވާނެ ކަމެވެ.