ޑރ. މަޢުސޫމާ ކަމާލުއްދީން ވ. ނެތް

ފެމިލީ ކޯޓުގެ ރަޖިސްޓްރާރު، ވަޞިއްޔަތު ލިބޭ ފަރާތަކީ ހިބައިން ނުވަތަ ވަޞިއްޔަތުން ދިނުމާބެހޭ ގަވާއިދުގެ 3 ވަނަ މާއްދާގައިވާ ގުޅުމެއް ހުރި، އަދި 4 ވަނަ މާއްދާގައިވާ ފަދަ ގޯއްޗެއް އޮތް ފަރާތެއް ކަމުން ފޯމު ބަލައިނުގަނެ، އަލުން ބެލުމުގައިވެސް ސަރުކާރުން ދިން ނުވަތަ ހިބައިން ލިބުނު ކޮންމެ ގޯއްޗެއް 4 ވަނަ މާއްދާގައި ހިމެނޭކަމަށް ނިންމިއެވެ.

އިސްތިއުނާފުކުރި ފަރާތުން ތިމާގެ ފަރާތަކަށް ވަޞިއްޔަތުން ދިނުމަށް ފެމިލީ ކޯޓަށް ފޯމު ހުށަހެޅިއެވެ. ވަޞިއްޔަތު ލިބޭ ފަރާތަށް ކުރިން އިސްތިއުނާފުކުރި ފަރާތުން ހިބައިން ދިން ގޯއްޗެއް ލިބިފައިވެއެވެ.

އިސްތިއުނާފުކުރި ފަރާތުން ބުނީ ބިމާބެހޭ ޤާނޫނުގެ 11 ވަނަ މާއްދާގައި ވަނީ ސަރުކާރުން ދިރިއުޅުމަށް ގޯތި ދޫކުރާ އުޞޫލު ކަމަށާއި، ވަޞިއްޔަތު ލިބޭ ފަރާތަށް ސަރުކާރުން ގޯއްޗެއް ދީފައިނުވާތީ ހިބައިން ނުވަތަ ވަޞިއްޔަތުން ދިނުމާބެހޭ ގަވާއިދުގެ 4 ވަނަ މާއްދާ ނުހިނގާނެކަމަށާއި، 3 ވަނަ މާއްދާގައި ނެތް ކަމެއް ހިމަނާފައިވާ ކަމަށެވެ.

ހިބައިން ނުވަތަ ވަޞިއްޔަތުން ދިނުމާބެހޭ ގަވާއިދުގެ 4 ވަނަ މާއްދާގައި ބިމާބެހޭ ޤާނޫނުގެ 11 ވަނަ މާއްދާއަށް ޙަވާލާދީފައިވާ 'ގޯއްޗެއް' ގެ ތެރޭގައި ހިމެނެނީ ސަރުކާރުން ދިރިއުޅުމަށް ދޫކުރި ގޯތި އެކަނިތޯ، ނުވަތަ ހިބައިން ލިބުނު ގޯއްޗެއްވެސް ހިމެނޭތޯއާއި، އެ ސަބަބުން ގޯއްޗެއް ލިބިފައިވާ ތިމާގެ ފަރާތަކަށް ވަޞިއްޔަތުން ދިނުމަށް ހުށަހެޅި ފޯމު ބަލައިނުގަތުން ރަނގަޅުތޯ.

އިސްތިއުނާފު ބާޠިލް، ފެމިލީ ކޯޓުގެ ނިންމުން ޤާއިމް

ބިމާބެހޭ ޤާނޫނާއި ގަވާއިދު އެކުގައި ޢާންމު މާނައަށް ބަލައި ކިޔާއިރު، ގަވާއިދުގެ 4 ވަނަ މާއްދާގައި ބިމާބެހޭ ޤާނޫނުގެ 11 ވަނަ މާއްދާއަށް ޙަވާލާދީފައިވަނީ 'ގޯއްޗެއް' ތަޢުރީފުކުރުމަށް ކަމުން، ސަރުކާރުން ނުވަތަ ހިބައިން ލިބުނު ކޮންމެ ގޯއްޗެއް އޮތުމަކީ ހުރަހެކެވެ. އެހެން މާނަކުރުމަކީ ތަފާތުކުރުމަކަށްވާނެއެވެ.