2016/HC-A/152

ހުޅުމާލެ މެޖިސްޓްރޭޓް ކޯޓުން، ސިނާއަތް ޤާއިމުކުރަންޖެހޭ ވަކި ތާރީޚެއް އެއްބަސްވުމުގައި ނެތުމާއި، ނިމުމަކަށް ގެނައުމުގެ އިޖުރާއާތު ފުރިހަމަނުކުރުމުން، އެ ސިޓީއަކީ އެއްބަސްވުމާ ޚިލާފު ސިޓީއެއްކަމަށާއި، އެއްބަސްވުން ދެމިއޮންނާނެކަމަށާއި، ގެއްލުމުގެ ބަދަލު ހޯދުމަށް ދަޢުވާކުރުމުގެ ޙައްޤު ކުއްޔަށް ހިފި ފަރާތަށް ލިބިގެންވާކަމަށް ޙުކުމްކުރިއެވެ.

ހުޅުމާލޭގައި ސިނާއީ ބިމެއް 25 އަހަރަށް ކުއްޔަށް ދިނުމަށް 2005 ގައި ވެވުނު އެއްބަސްވުމުގެ ދަށުން، ގާތްގަނޑަކަށް 10 އަހަރު ވަންދެން ބިމުގައި ސިނާއަތް ޤާއިމުނުކުރާތީ، ކުއްޔަށް ދޫކުރި ފަރާތުން އެއްބަސްވުމުގެ 16 ވަނަ މާއްދާގެ ދަށުން އެއްބަސްވުން ނިމުމަކަށް ގެނައިކަމަށް 2015 ގައި ސިޓީއިން އެންގިއެވެ.

ކުއްޔަށް ދޫކުރި ފަރާތުން، ސިނާއަތް ޤާއިމުކުރުމަކީ އެއްބަސްވުމުގެ ޖައުހަރީ މާއްދާއެއްކަމަށާއި، ކޮންޓްރެކްޓާބެހޭ ޤާނޫނުގެ 20 ވަނަ މާއްދާގެ (ނ) އާއި (ހ) އަށާއި އެއްބަސްވުމުގެ 16 ވަނަ މާއްދާގެ އިޚްތިޔާރަށް ރިޢާޔަތްނުކުރިކަމަށް ބުންޏެވެ. ކުއްޔަށް ހިފި ފަރާތުން، މިއީ ކުލީގެ އެއްބަސްވުމެއްކަމަށާއި، ކުލި ދައްކަމުންދާހާ ހިނދަކު އެއްބަސްވުން ބާޠިލުނުކުރެވޭނެކަމަށާއި، އެއްބަސްވުމުގެ 16 އާއި 17 ވަނަ މާއްދާ އެއްކޮށް ކިޔާއިރު ރަނގަޅުކުރުމަށް މުއްދަތު ދޭންޖެހޭކަމަށް ބުންޏެވެ.

ސިނާއީ ބޭނުމަށް ބިން ކުއްޔަށް ދިނުމުގެ އެއްބަސްވުމެއްގައި ސިނާއަތް ޤާއިމުކުރަންޖެހޭ ވަކި މުއްދަތެއް ބަޔާންކޮށްފައި ނެތް ޙާލަތުގައި، ސިނާއަތް ޤާއިމުނުކޮށް ތިބުމަކީ އެއްބަސްވުމާ ޚިލާފުވުމެއްތޯ، އަދި ރަނގަޅުކުރުމަށް އެންގުމަކާ ނުލައި ކުއްޔަށް ދޫކުރި ފަރާތުން އެއްބަސްވުން ނިމުމަކަށް ގެނައުމަކީ އެއްބަސްވުމާ ޚިލާފު ކަމެއްތޯ.

ދަށުކޯޓުގެ ޙުކުމް ބާޠިލު

ސިނާއަތް ޤާއިމުކުރުމަކީ އެއްބަސްވުމުގެ މައިގަނޑު މަޤްޞަދަށްވެ، ވަކި މުއްދަތެއް ނެތް ޙާލަތުގައި ކޮންޓްރެކްޓާބެހޭ ޤާނޫނުގެ 20 ވަނަ މާއްދާގެ (ނ) ގެ އެކަށީގެންވާ މުއްދަތަށް ބަލާއިރު 10 އަހަރަކީ އެކަށީގެންވާ މުއްދަތަކަށް ވާތީ ކުއްޔަށް ހިފި ފަރާތް އެއްބަސްވުމާ ޚިލާފުވެފައިވާކަމަށާއި، އެއްބަސްވުމުގެ 16 ވަނަ މާއްދާއަކީ ރަނގަޅުކުރުމަށް އެންގުމުގެ އިޚްތިޔާރެއް ކަމުން، އެ އިޚްތިޔާރުގެ ބޭނުން ނުކޮށް އެއްބަސްވުން ނިމުމަކަށް ގެނެވިދާނެކަމަށް ކަނޑައެޅިއެވެ.