2016/HC-A/150

ސިނާޢަތް ޤާއިމުކުރަންޖެހޭ ވަކި ތާރީޚެއް އެއްބަސްވުމުގައި ނެތުމާއި، އެއްބަސްވުން ނިމުމަކަށް ގެންނައިރު ފުރިހަމަކުރަންޖެހޭ އިޖުރާއަތު ފުރިހަމަ ނުކުރުމުން، އެ ނޯޓިސްއަކީ އެއްބަސްވުމާ ޚިލާފު ސިޓީއެއްކަމަށާއި، އެއްބަސްވުން ދެމިއޮންނާނެކަމަށް ހުޅުމާލެ މެޖިސްޓްރޭޓް ކޯޓުން ޙުކުމްކުރިއެވެ.

ސިނާއީ ބޭނުމަށް ހުޅުމާލެއިން 25 އަހަރަށް ބިމެއް ކުއްޔަށް ދިނުމަށް ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑާއި ވިލާ ހަކަތަ ޕްރައިވެޓް ލިމިޓެޑާ ދެމެދު އެއްބަސްވުމެއް ވެވުނެވެ. ގާތްގަނޑަކަށް 10 އަހަރު ވީއިރުވެސް އެބިމުގައި އެއްބަސްވުމުގައިވާ ސިނާޢަތް ޤާއިމު ނުކުރުމުން ކުއްޔަށް ދޫކުރި ފަރާތުން އެއްބަސްވުން ނިމުމަކަށް ގެނައެވެ.

އިސްތިއުނާފުކުރި ފަރާތުން ބުނީ ސިނާޢަތް ޤާއިމުކުރުމަކީ އެއްބަސްވުމުގެ ޖައުހަރީ މާއްދާއެއްކަމަށާއި، ކޮންޓްރެކްޓާބެހޭ ޤާނޫނުގެ މާއްދާތަކާއި އެއްބަސްވުމުން ލިބޭ އިޚްތިޔާރަށް ދަށުކޯޓުން ރިޢާޔަތްނުކުރިކަމަށެވެ. ރައްދުވި ފަރާތުން ބުނީ އެއީ ކުލީގެ އެއްބަސްވުމެއްކަމަށާއި، ބިން ތަރައްޤީކުރުމަކީ ޖައުހަރީ މާއްދާއެއް ނޫންކަމަށެވެ.

ސިނާއީ ބޭނުމަށް ބިން ކުއްޔަށް ދިނުމުގެ އެއްބަސްވުމެއްގައި ސިނާޢަތް ޤާއިމުކުރަންޖެހޭ ވަކި ތާރީޚެއް ނެތްނަމަވެސް، އެކަށީގެންވާ މުއްދަތެއްގެ ތެރޭގައި ސިނާޢަތް ޤާއިމުނުކުރުމަކީ އެއްބަސްވުމާ ޚިލާފުވުމެއްތޯ؛ އަދި ކުލި ދޫކުރާ ފަރާތުން ރަނގަޅުކުރުމަށް އެންގުމަކާނުލައި އެއްބަސްވުން ނިމުމަކަށް ގެނައުމަކީ ޞައްޙަ ކަމެއްތޯ.

ދަށުކޯޓުގެ ޙުކުމް ބާޠިލު

ސިނާޢަތް ޤާއިމުކުރުމަކީ އެއްބަސްވުމުގެ މައިގަނޑު މަޤްޞަދާއި ކުލި ހިފި ފަރާތުގެ ލާޒިމެއް ކަމަށްވާތީއާއި، ވަކި މުއްދަތެއް ނެތްނަމަވެސް އެކަށީގެންވާ މުއްދަތެއްގެ ތެރޭގައި އެކަން ކުރަންޖެހޭތީއާއި، 10 އަހަރަކީ އެކަށީގެންވާ މުއްދަތެއް ކަމަށް ނުބެލެވޭތީއާއި، ރަނގަޅުކުރުމަށް އެންގުމުގެ މާއްދާއަކީ ލާޒިމް މާއްދާއެއް ނޫންތީ، އެއްބަސްވުން ނިމުމަކަށް ގެނައުމަކީ އެއްބަސްވުމާ ޚިލާފު ކަމެއް ނޫނެވެ.