2014/HC-A/275

ބަންޑާރަ ބިމުން ހުރިހާ ވާރިޘުންނަށް ހަމަހަމަކޮށް ލިބި، ޢިމާރާތްތަކާއި ނުއުފުލޭ މުދަލުގެ 1/4 ބައި ފިރިއަށާއި 3/4 ބައި ފިރިހެން ދަރިއަށް މިލްކުވާކަމަށް ސިވިލް ކޯޓުން ޙުކުމްކުރިއެވެ.

ހަދިއްޔަތު މޫސާގެ ނަމުގައި ރަޖިސްޓްރީ ކުރެވިފައިވާ ބަންޑާރަ ގޯއްޗާއި އޭގެ ޢިމާރާތްތައް ތަރިކައިގެ އުޞޫލުން ބެހުމަށް އޭނާގެ ފިރި އާދަމް ޙުސައިން ދަޢުވާކުރިއެވެ. ބިމަކީ އޭނާގެ ބައްޕަގެ ތަރިކައެއްކަމަށާއި، ޢިމާރާތުގެ ބައިތައް އޭނާއަށް މިލްކުކަމަށް ބުނެ ޢާފިޔާ މުޙައްމަދުދީދީ އެއާ ދެކޮޅު ހެދިއެވެ.

ބިމަކީ ރަންނަރުގެ މުޙައްމަދުދީދީގެ ތަރިކައެއްކަމާއި، ޕްރޮޕަޓީ ކްލެއިމްސް ޑިވިޝަންގެ 16/PCD/71 ގެ ދަށުން ޢިމާރާތުގެ 7/8 ބައި އިސްތިއުނާފުކުރި ފަރާތަށް މިލްކުކަމަށް ބުނެ ހުށަހެޅި ލިޔުންތަކަށް ދަށުކޯޓުން ރިޢާޔަތްނުކުރިކަމަށް ބުނެފައިވެއެވެ.

ޙާޟިރުނުވުމުން މައްސަލައިގެ ތެރެއަށް ވަނުމުގެ ފޯމު ބާޠިލުކުރި ފަރާތުގެ ލިޔުންތަކަށް ދަށުކޯޓުން ރިޢާޔަތްކުރަންޖެހޭތޯއާއި، ދައުލަތުގެ ބޭނުމަށް ނަގައި ފަހުން ގޯތިއަށް އިތުރުކޮށްދިން ބިމަކީ ކުރީގެ މިލްކުވެރިޔާގެ ތަރިކައިގައި ހިމެނޭ ބިމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ރަޖިސްޓްރީގައި ގޯތި އޮތީ ހަދިއްޔަތު މޫސާގެ ނަމުގައެވެ؛ މައްސަލައިގެ ތެރެއަށް ވަނުމުގެ ފޯމު ޙާޟިރުނުވުމުން ބާޠިލުވެފައިވެއެވެ؛ ޢިމާރާތުގެ އަގު ދިނުމުގެ މައްސަލަ 71/PCD144 އާއި A/137-98/HC ގައި ނިމިފައިވެއެވެ؛ އަދި ދައުލަތުން ނެގި ބިމަކީ ނިޔައުވިއިރު މުޙައްމަދުދީދީގެ ނަމުގައި އޮތް ބިމެއް ނޫނެވެ.