2017/HC-A/07

ކްރިމިނަލް ކޯޓުން، ހެކިންގެ ހެކިބަހާއި ޤަރީނާތަކުން ކުށް ސާބިތުވާކަމަށް ކަނޑައަޅައި، 15 އަހަރު ދުވަހަށް ޖަލަށްލުމަށް ޙުކުމްކުރި.

އިތުބާރުކުރެވޭ މަޤާމެއްގައި ހުރެ ދެ ކުޑަކުދިންނާމެދު ގަދަކަމުން ބަދުއަޚްލާޤީ ޢަމަލު ހިންގިކަމަށް ތުހުމަތުކުރެވޭ ފަރާތުގެ މައްޗަށް ޤާނޫނު ނަންބަރު 12/2009 ގެ 9 ވަނަ މާއްދާގެ ދަށުން ދައުލަތުން ދަޢުވާކުރި؛ ތުހުމަތުކުރެވޭ ފަރާތް ދަޢުވާއަށް އިންކާރުކުރި.

ތުހުމަތުކުރެވޭ ފަރާތުން ބުނީ ދަޢުވާގައިވާ ފިޢުލާއި އަދަބު ކަނޑައެޅި މާއްދާ ދިމާނުވާކަމަށާއި، ޤާނޫނުއަސާސީގެ 42، 51، 52، 143 ވަނަ މާއްދާތަކާއި ޤާނޫނު 12/2009 ގެ 48 ވަނަ މާއްދާއާ ޚިލާފަށް ހޯދާފައިވާ ހެކިތަކުން، ޝައްކު ނެތް މިންވަރަށް ސާބިތު ނުވާ ދަޢުވާއެއް ސާބިތުވާކަމަށް ނިންމާފައިވާ ކަމަށެވެ.

ޤާނޫނު ނަންބަރު 12/2009 ގެ 9 ވަނަ މާއްދާގެ ދަށުން އިތުބާރުކުރެވޭ މަޤާމެއްގައި ހުރެ ކުޑަކުއްޖަކާއެކު ޖިންސީ ޢަމަލެއް ހިންގުމުގެ ކުށުގައި، ދައުލަތުން ހުށަހެޅި ހެކިތަކުން އެ ޤާނޫނުގެ 47 ވަނަ މާއްދާގެ 5 ބާވަތުގެ ހެކި ހަމަވެ، ކުށް އެކަށީގެންވާ ޝައްކެއްނެތް މިންވަރަށް ސާބިތުވޭތޯ.

ދަށުކޯޓުގެ ޙުކުމް ބާޠިލު (ކުށް އެކަށީގެންވާ ޝައްކެއްނެތް މިންވަރަށް ސާބިތުނުވާ)

ކުއްޖާ ތަޙްޤީޤަށް ދިން ބަޔާން (ކ) ބާވަތުގެ، ގާތްތިމާގެ މީހާއާއި ސައިކޮލޮޖިސްޓާއި ޖެންޑަރ ޑިޕާޓްމަންޓަށް ކިޔައިދިނުން (ޅ) ބާވަތުގެ، އަދި ތަޙްޤީޤުގެ ރިކޯޑިންގ (ދ) ބާވަތުގެ ހެކިކަމުގައި ވީނަމަވެސް 2014/HC-DM/01 ގެ ދަށުން މިއީ އެއް ބާވަތެއްގެ ހެކި؛ މެޑިކޯ ލީގަލް ރިޕޯޓުން އަނިޔާތަކަކީ ޖިންސީ ޢަމަލެއްގެ ސަބަބުން ލިބުނު އަނިޔާކަން ނޭނގޭ؛ ގާތްތިމާގެ ހެކިވެރިޔާ ކުއްޖާ ބުނި ވާހަކަ ތެދުކަމެއް ނުބުނެވޭތީ އޭނާގެ ހެކިބަސް ނުލިބޭ؛ އެހެންކަމުން 5 ބާވަތުގެ ހެކި ހަމަނުވެ، ކުށް ޝައްކު ނެތް މިންވަރަށް ސާބިތުނުވި.