2016/HC-A/579

ސިވިލް ކޯޓުން، އެ ފައިސާއަކީ ދައްކަންޖެހި ނުދައްކާހުރި ފައިސާއެއްކަމަށް މަދަނީ މިންގަޑުން ސާބިތުވާކަމަށް ކަނޑައަޅައި، 3 މަހުގެ ތެރޭގައި ދައްކައި ޚަލާޞްކުރުމަށް ޙުކުމްކުރިއެވެ.

ކައިވެނިކުރުމުގެ ކުރިން، އިސްތިއުނާފުކުރި ފަރާތް އެދިގެން އޭނާގެ ބޭންކް އެކައުންޓަށް އިސްތިއުނާފު ރައްދުވި ފަރާތުން 50,000 ރުފިޔާ ޖަމާކުރިއެވެ. އެ ފައިސާ އަނބުރާ ނުލިބޭތީ އޭނާ ސިވިލް ކޯޓުގައި ދަޢުވާކުރިއެވެ.

އިސްތިއުނާފުކުރި ފަރާތް ބުނީ، ޘާބިތުކުރުމުގެ ބުރަ އޮންނަނީ ދަޢުވާކުރާ ފަރާތުގެ މައްޗަށްކަމަށް 2010/SC-A/02 ގައިވާ އުޞޫލާ ޚިލާފަށް ނިންމާފައިވާ ކަމަށާއި، ފައިސާ ޖަމާކުރީ އަންބެއްގެ މަޤާމުގައި ހުރެ ނޫންކަމަށާއި، ފައިސާއަކީ ދަޢުވާކުރި ފަރާތުގެ ބޭނުންތަކަށް ތަކެތި ގަތުމަށް ފޮނުވި ފައިސާއެއްކަމަށް ދެހެކިން ދިން ހެކިބަހަށް ރިޢާޔަތް ނުކުރާ ކަމަށެވެ.

އެހެން ފަރާތެއްގެ އެކައުންޓަށް ޖަމާކުރި ފައިސާ ހޯދުމަށް ކުރާ ދަޢުވާއެއްގައި، ފައިސާ ލިބުނުކަމަށް އެއްބަސްވެ އެ ފައިސާ ދަޢުވާކުރާ ފަރާތުގެ ބޭނުންތަކަށް ޚަރަދުކުރިކަމަށް ދިފާޢު ނަގާއިރު ޘާބިތުކުރުމުގެ ބުރަ އޮންނަނީ ކޮން ފަރާތެއްގެ މައްޗަށްތޯއާއި، ދަށުކޯޓުން ހެކި ވަޒަންކުރި ގޮތް ރަނގަޅުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފައިސާ ލިބުނުކަމަށް އެއްބަސްވެ ޚަރަދުކުރިކަމަށް ދިފާޢު ނަގާތީ އެ ދިފާޢު ޘާބިތުކުރުމުގެ ބުރަ އޮތީ އިސްތިއުނާފުކުރި ފަރާތުގެ މައްޗަށެވެ. ހެކީންގެ ހެކިބަހުން ފައިސާއަކީ ތަކެތި ހޯދުމަށް ޖަމާކުރި ފައިސާއެއްކަން ނޭނގޭއިރު، ހައިކޯޓަށް ހުށަހެޅި ލިޔުންތަކުން ހެކި ލިބިގެންދަނީ އިސްތިއުނާފު ރައްދުވި ފަރާތުގެ ބުނުމާ އެއްގޮތަށެވެ.