2014/HC-A/158

ސިވިލް ކޯޓުން، ނުދައްކާ ހުރި ކުލި 202,220 ރުފިޔާއާއި ޖޫރިމަނާ 409,394.39 ރުފިޔާ، ޖުމްލަ 611,614.39 ރުފިޔާ 6 މަސްދުވަހުގެ ތެރޭގައި ބައިބަޔަށް ދައްކަން ޢަލީ ޚާލިދަށް ޙުކުމްކުރިއެވެ.

ސަރުކާރުން ދިން ލޯނަކަށް ރަހުނުކުރެވިފައިވާ ގޭގެ ސްޓޫޑިއޯ ހުރި ބައި، މިނިސްޓްރީ އޮފް ފިނޭންސް އެންޑް ޓްރެޜަރީން 2007 ޖުލައި 29 ގައި ވެވުނު އެއްބަސްވުމެއްގެ ދަށުން 2007 އޯގަސްޓް 1 އިން 2012 މާރޗް 31 އަށް މަހަކު 10,111 ރުފިޔާއަށް ޢަލީ ޚާލިދަށް ކުއްޔަށް ދިނެވެ. އެއްބަސްވުމުގެ 5 ވަނަ މާއްދާގައި ކޮންމެ މަހެއްގެ 10 ގެ ކުރިން ކުލި ދައްކަންވާނެ ކަމަށާއި، ލަސްވާ ކޮންމެ ދުވަހަކަށް މަހުކުލީގެ 0.5% ޖޫރިމަނާ ނަގާނެ ކަމަށާއި، 15 ގެ ކުރިން ނުދައްކައިފިނަމަ ތަން ހުސްކުރަންވާނެ ކަމަށް ބަޔާންކޮށްފައިވެއެވެ.

ޢަލީ ޚާލިދު ބުނީ ރިސިޕްޓަކާއި މިނިސްޓްރީގެ ސްޓޭޓްމަންޓުގެ ޑިއު ޑޭޓް އަދި ޕެއިޑް ޑޭޓުން ކުލި ދައްކާފައިވާކަން ސާބިތުވާ ކަމަށާއި، ތަން ހުސްކުރަން ނުއަންގައި ޖޫރިމަނާ ނުލައި ކުލި ބަލައިގަތުމުން ދައުލަތުން ޖޫރިމަނާ ދޫކޮށްލާފައިވާ ކަމަށާއި، ޖޫރިމަނާ ނަގަނީ ރިބާގެ އުޞޫލުން ކަމަށެވެ. ދައުލަތުން ބުނީ 2010 ޖުލައިން ފެށިގެން ކުލި ދައްކާފައި ނުވާ ކަމަށާއި، ޖޫރިމަނާއަށް ދުލެއް ދިނުމަށް އެއްބަސްވެފައި ނުވާ ކަމަށެވެ.

ކުލި ދައްކާފައިވާކަން ސާބިތުކުރުމުގެ ބުރަ އުފުލަންޖެހެނީ ކާކު ތޯއާއި، ކުލި ނުދައްކާ ޙާލަތުގައި ތަން ހުސްކުރަން ނުއަންގައި، ޖޫރިމަނާ ނުލައި ކުލި ބަލައިގަތުމުން ކުއްޔަށްދިން ފަރާތުން އެއްބަސްވުމުގެ ދަށުން ޖޫރިމަނާ ނެގުމުގެ ޙައްޤު ދޫކޮށްލި (waive ކުރި) ކަމުގައި ބެލެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުލި ދެއްކިކަމަކީ ކުއްޔަށް ހިފި ފަރާތުން ކުރާ ދަފްޢެއް ކަމަށްވާތީ އެކަން ސާބިތުކުރުމުގެ ބުރަ އުފުލަންޖެހެނީ އެ ފަރާތް ކަމަށާއި، ޚިލާފު އުފެދިފައިވާ މަސްތަކަށް ރިސިޕްޓެއް ނުވަތަ އެހެން ހެއްކެއް ހުށަހަޅާފައި ނުވާ ކަމަށް ކޯޓު ކަނޑައެޅިއެވެ. ކޮންޓްރެކްޓާބެހޭ ޤާނޫނުގެ 20 (ހ) ގެ ދަށުން ދުލެއް ދިނުމަށް އެއްބަސްވެފައިވާކަމުގެ ހެއްކެއް ނެތުމުން، ޖޫރިމަނާ ނުލައި ކުލި ބަލައިގަތުމާއި ތަން ހުސްކުރަން ނުއެންގުމަކީ ޖޫރިމަނާ waive ކުރިކަމުގެ ޙުއްޖަތެއް ނޫން ކަމަށާއި، މަންފާ ލިބިގަތުމަށްފަހު ރިބާގެ ސަބަބު ދައްކައިގެން އިލްތިޒާމްތަކުން އެއްކިބާނުވެވޭނެ ކަމަށް ކަނޑައަޅައި ޙުކުމް ޤާއިމްކުރިއެވެ.