2016/HC-A/335

ނުދައްކާވާ 22500 ރުފިޔާގެ ތެރެއިން 6000 ރުފިޔާ ބައްޕަގެ ބޭންކް އެކައުންޓުން ކަނޑައި ކޯޓަށް ދެއްކުމަށް ބޭންކަށާއި، ބާކީ 16500 ރުފިޔާ އެއް އަހަރުގެ ތެރޭގައި މަހުން މަހަށް މުސާރައިން ކަނޑައި ކޯޓަށް ދެއްކުމަށް ވަޒީފާދޭ ފަރާތަށް އަމުރުކޮށް، ޚަރަދު ދައްކަމުން ގެންދިއުމަށް ބައްޕައަށް އަންގައި މެޖިސްޓްރޭޓް ކޯޓުން ޙުކުމްކުރިއެވެ.

ކުރިން ނިމުނު ޤަޟިއްޔާއަކުން ކުދިންގެ ޚަރަދަށް މަހަކު 3000 ރުފިޔާ ދެއްކުމަށް ބައްޕައަށް ޙުކުމްކޮށްފައިވާއިރު، އެ ޙުކުމާއި އެއްގޮތަށް ފައިސާ ނުދައްކާތީ ކުދިންގެ މަންމަ މެޖިސްޓްރޭޓް ކޯޓަށް ދަޢުވާކުރިއެވެ.

ބައްޕަ: ޙުކުމަކީ ޢާއިލާއާބެހޭ ޤަވާޢިދުގެ 64 ވަނަ މާއްދާގެ މަޤްޞަދު ގެއްލޭ ގޮތަށާއި ޢާއިލީ ޙުކުމް ތަންފީޛުކުރުމުގެ އުޞޫލުތަކާ ޚިލާފަށް ކުރި ޙުކުމެކެވެ؛ ބޭންކު އެކައުންޓުން ފައިސާ ކެނޑުމަށް އަމުރުކުރުމަކީ 67 ވަނަ މާއްދާއާ ޚިލާފު ކަމެކެވެ.

ސާބިތު ޚަރަދު ޙުކުމާއި އެއްގޮތަށް ނުދައްކާތީ ހުށަހެޅުނު މައްސަލައެއްގައި ބައްޕަގެ ބޭންކް އެކައުންޓުން ފައިސާ ނެގުމަށާއި މުސާރައިން ކެނޑުމަށް މެޖިސްޓްރޭޓް ކޯޓުން އެޅި ފިޔަވަޅުތަކަކީ ޢާއިލާއާބެހޭ ޤަވާޢިދުގެ 64 ވަނަ މާއްދާގެ މަޤްޞަދާއި 67 ވަނަ މާއްދާއާ ޚިލާފު ފިޔަވަޅުތަކެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުރީގެ ޙުކުމަކީ ނިހާއީ ޙުކުމެއް ކަމާއި ޙުކުމާއި އެއްގޮތަށް ފައިސާ ދައްކާފައިނުވާކަން ސާބިތުވާތީ، ޢާއިލާއާބެހޭ ޤަވާޢިދުގެ 67 އާއި 69 ވަނަ މާއްދާގެ މަޤްޞަދަކީ ސާބިތު ޚަރަދު ހޯދައިދިނުން ކަމަށްވާތީ، އަދި 67 (ކ) ގެ ދަށުން ފަނޑިޔާރަށް އިތުރު ފިޔަވަޅު އެޅުމުގެ އިޙްތިޔާރު ލިބިގެންވާތީ، ދަށުކޯޓުން އެޅި ފިޔަވަޅުތަކަކީ ދަރިންގެ ޙައްޤު ފުރިހަމައަށް ލިބިދޭ ފިޔަވަޅުތަކެވެ.