2016/HC-A/304

ރ.ދުވާފަރު މެޖިސްޓްރޭޓް ކޯޓުން، އުޞޫލުގެ 1 ވަނަ ނަންބަރުގެ 2 ވަނަ ނުކުތާގެ ދަށުން ދަޢުވާކުރި ފަރާތަކީ ގެއެއް ލިބެންޖެހޭ ފަރާތެއްކަމަށް ކަނޑައަޅައި، 6 މަސްދުވަހުގެ ތެރޭގައި ކަނދޮޅުދޫ ރައްޔިތުންނަށް ދޫކޮށްފައިވާ ގެއާ އެއްފެންވަރުގެ ގެއެއް ދިނުމަށް ދައުލަތަށް އަމުރުކުރިއެވެ.

ސުނާމީ ކާރިސާއަށްފަހު ރ.ކަނދޮޅުދޫ ފަޅުރަށެއްކަމަށް ކަނޑައަޅައި ރައްޔިތުން ރ.ދުވާފަރަށް ބަދަލުކުރިއިރު، ކަނދޮޅުދޫގައި އަމިއްލަ ނަމުގައި ރަޖިސްޓްރީވެފައިވާ، ޢިމާރާތެއް ކުރަމުން ދިޔަ ގޯއްޗެއްގެ ވެރިފަރާތަށް ދުވާފަރުން ވަކިން ގެއެއް ނުދީ ބިން ދައުލަތަށް ނެގުމުން، ގެއެއް ލިބެންޖެހޭކަމަށް ކަނޑައަޅައިދިނުމަށް ދައުލަތުގެ މައްޗަށް ކުރި ދަޢުވާއެކެވެ.

އެޓަރނީ ޖެނެރަލް ބުނީ ޙުކުމަކީ ޤާނޫނުއަސާސީގެ 23 ވަނަ މާއްދާއާއި ގެ ދިނުމުގެ މިންގަނޑުތަކާ ޚިލާފު ޙުކުމެއް ކަމަށާއި، ކާރިސާ ހިނގިއިރު ދަޢުވާކުރި ފަރާތް ރަށުގައި ދިރިނޫޅޭތީ ޝަރުތު ފުރިހަމަނުވާ ކަމަށާއި، 2012/HC-A/273 ތަޠުބީޤުކުރީ ގޯހަށް ކަމަށާއި، ނޭޝަނަލް ޑިޒާސްޓަރ މެނޭޖްމަންޓް ސެންޓަރަށް ޙުކުމް ތަންފީޛެއް ނުކުރެވޭނެ ކަމަށެވެ.

ސުނާމީ ކާރިސާއާ ގުޅިގެން ސަރުކާރުން ޢިމާރާތްކޮށްދެއްވާ ގެތައް ލިބޭ ފަރާތްތައް ކަނޑައެޅުމުގެ އުޞޫލުގެ ދަށުން، ކާރިސާ ހިނގިއިރު ރަށުގައި ދިރިނޫޅުނު، އަމިއްލަ ނަމުގައި ގޯތި ރަޖިސްޓްރީވެފައިވާ ފަރާތަކަށް ގެއެއް ލިބެންޖެހޭތޯއާއި، އެ ޙުކުމް ދައުލަތަށް ތަންފީޛުކުރެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އުޞޫލުގެ ދަށުން އަމިއްލަ ނަމުގައި ހުރި ގެއަކަށް ގެއެއް ލިބޭނެ ކަމަށާއި، ދިރިއުޅެން ނުފަށާ ހުރި ގެއަކަށްވެސް ގެ ލިބޭ ކަމަށް ބަޔާންވެގެންވާތީ ދަޢުވާކުރި ފަރާތް ޝަރުތު ފުރިހަމަވާ ކަމަށާއި، އެހެން ފަރާތްތަކަށް ގެ ދީ އެ ފަރާތަށް ނުދިނުމަކީ ތަފާތުކުރުން ކަމަށާއި، ޙުކުމް ތަންފީޛުކުރުމުގައި މުއައްސަސާ ބަދަލުވުމަކީ ހުރަހެއް ނޫންކަމަށް ކަނޑައަޅައި ޙުކުމް ޤާއިމްކުރިއެވެ.