މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ ވ. ޙުސައިން ޢަބްދުﷲ

ދުވާފަރު މެޖިސްޓްރޭޓް ކޯޓުން، 3 މަސްދުވަހުގެ ތެރޭގައި ރ. ދުވާފަރުން ގޯއްޗެއް ދިނުމަށް ދައުލަތަށް އަމުރުކޮށް، މަޢުނަވީ ބަދަލެއް ނެތްކަމަށް ޙުކުމްކުރިއެވެ.

ސުނާމީ ކާރިޘާއާ ގުޅިގެން ރ. ކަނދޮޅުދޫ ރައްޔިތުން ރ. ދުވާފަރަށް ބަދަލުކުރުމުގައި، އިސްތިއުނާފު ރައްދުވި ފަރާތަށާއި ޢާއިލާއަށް ރެޑްކްރޮސް (IFRC) ޕްރޮގްރާމްގެ ދަށުން ގެއެއް ދެވުނެވެ. ނަމަވެސް އޭނާ ބުނީ އިމާރާތްކުރަމުން ދިޔަ "ސާޙިލް" ބިމުގެ ބަދަލުގައި އިތުރު ގޯއްޗެއް ދޭން ޖެހޭނެ ކަމަށެވެ.

ދައުލަތުން ބުނީ ޙުކުމަކީ ނުޙައްޤު މުއްސަނދިކަން ލިބިދޭ ޙުކުމެއް ކަމަށާއި، ޙުކުމަށް ވާޞިލުވި ގޮތް ސާފުނުވާ ކަމަށާއި، ހެކިތަކަށް ރިޢާޔަތްކޮށްފައި ނުވާ ކަމަށާއި، ޤާނޫނުއަސާސީގެ 20 އަދި 23 ވަނަ މާއްދާއާ ޚިލާފު ކަމަށެވެ.

ސުނާމީ ކާރިޘާއާ ގުޅިގެން ހިންގި ބޯހިޔާވަހިކަމުގެ ޕްރޮގްރާމެއްގެ ދަށުން ގެއެއް ލިބިފައިވާ ފަރާތަކަށް، އިމާރާތްކުރަމުން ދިޔަ ބިމެއްގެ ބަދަލުގައި ދައުލަތުން އިތުރު ގޯއްޗެއް ދޭން ޖެހޭނެކަމަށް ދަށުކޯޓުން ކުރި ޙުކުމަކީ ޕްރޮގްރާމްގެ މިންގަނޑުތަކާއި ޤާނޫނުއަސާސީގެ 23 ވަނަ މާއްދާއާއި ނުޙައްޤު މުއްސަނދިކަމުގެ އުޞޫލާ އެއްގޮތްވާ ޙުކުމެއްތޯ.

ދަށުކޯޓުގެ ޙުކުމް ބާޠިލު

ކާރިޘާ ހިނގިއިރު "ސާޙިލް" ގައި މީހުން ދިރިނޫޅުނުތީ IFRC މިންގަނޑުގެ ދަށުން އޭގެ ބަދަލުގައި ގެއެއް ދެވޭނެ އުޞޫލެއް ނެތެވެ. ލިސްޓާމެދު ޝަކުވާއެއް ނުކުރުމުން އޭނާ އެކަމަށް ރުހުން ދީފައިވެއެވެ. ޢާއިލާއަށް ޙައްޤުވާ 1 ގެ ލިބިފައިވާތީ އިތުރު ގޯއްޗެއް ދިނުމަކީ ނުޙައްޤު މުއްސަނދިކަމެކެވެ.