2016/HC-A/153

ސިވިލް ކޯޓުން (C/2015-381/Cv) ކަނޑައެޅީ، އެމެންޑަޑް އެންޑް ރީ-ސްޓޭޓެޑް ލީޒް އެގްރިމަންޓް އުވާލި އެންގުމަކީ އެ އެގްރިމަންޓާ ޚިލާފު ބާޠިލް އެންގުމެއް ކަމަށެވެ.

ތ. އެލާ ކުއްޔަށް ދިނުމާ ގުޅިގެން 12 ޑިސެމްބަރު 2013 ގައި މިނިސްޓްރީ އޮފް ޓޫރިޒަމާއި ވިލާ ޝިޕިންގ އެންޑް ޓްރޭޑިންގ ކޮމްޕެނީ ޕްރައިވެޓް ލިމިޓެޑާ ދެމެދު ވެވުނު އެމެންޑަޑް އެންޑް ރީ-ސްޓޭޓެޑް ލީޒް އެގްރިމަންޓުގެ ދަށުން ކޮންސެޝަންސްތަކެއް ދީފައިވަނީ، ޢަލީ އިބްރާހީމްއާއި އޭނާއާ ގުޅުންހުރި ފަރާތްތަކުން ސަރުކާރާ ދެކޮޅަށް ކޯޓުގައި ހިނގަމުންދިޔަ މައްސަލަތައް ކޯޓުން ބޭރުން ޙައްލުކުރުމަށް ވެވުނު ސެޓްލްމަންޓް އެގްރިމަންޓްތަކާ ގުޅިގެންނެވެ. ވިލާ ޝިޕިންގ އަށް 70% ޙިއްޞާ އޮންނަ ވާރލްޑް ލިންކް ޓްރެވަލް ޕްރައިވެޓް ލިމިޓެޑުން ސަރުކާރާ ދެކޮޅަށް މައްސަލައެއް ހުށަހަޅާފައިވާތީ، ސެޓްލްމަންޓް އެގްރިމަންޓްތައް އުވާލި އަސާސްގެ މައްޗަށް މިނިސްޓްރީން 05 ފެބްރުއަރީ 2015 ގެ ސިޓީއިން ލީޒް އެގްރިމަންޓް އުވާލިއެވެ.

ދައުލަތުން ބުނީ، އެއްބަސްވުމެއް މާނަކުރުމުގައި ރިޢާޔަތްކުރެވޭނީ އޭގެ މަޤްޞަދަށް ކަމަށާއި، ދަށުކޯޓުން އެއްބަސްވުމުގެ މަޤްޞަދަށާއި ޕްރިއެމްބަލްގައިވާ 'އެފިލިއޭޓެޑް ޕާޓީސް' ގެ މާނައަށް ރިޢާޔަތް ނުކުރާ ކަމަށާއި، އެގްރިމަންޓް އުވާލީ އޭގެ މަޤްޞަދާ ޚިލާފުވެގެން ކަމަށް ވާއިރު އެއްބަސްވުމުގައި ބަޔާންކޮށްފައިނުވާ ޙާލަތްތަކަށް ދަށުކޯޓުން ރިޢާޔަތް ނުކުރާ ކަމަށެވެ. ވާރލްޑް ލިންކްގައި 70% ޙިއްޞާ އޮންނަ ކަމަށް ދައުލަތުން ބުނުމަށް ވިލާ ޝިޕިންގ އިން އިންކާރު ނުކުރެއެވެ.

އެއްބަސްވުމުގައި އުވާލެވިދާނެ ޙާލަތެއްގެ ގޮތުގައި ބަޔާންކޮށްފައި ނުވި ނަމަވެސް، އެއްބަސްވުމަށް ވާޞިލުވި މައިގަނޑު މަޤްޞަދާ ޚިލާފުވުމުގެ ސަބަބުން ދައުލަތުން އެމެންޑަޑް އެންޑް ރީ-ސްޓޭޓެޑް ލީޒް އެގްރިމަންޓް އުވާލުމަކީ ޝަރުޢީ އަދި ޤާނޫނީ އުޞޫލުތަކާ ޚިލާފު ކަމެއްތޯ؛ އަދި ސެޓްލްމަންޓް އެގްރިމަންޓްގެ ބޭނުމަށް ގުޅުންހުރި ފަރާތެއް (affiliated party) ކަމަށް ބަލަންވީ ކޮން ފަރާތެއްތޯ.

ދަށުކޯޓުގެ ޙުކުމް ބާޠިލު

އެގްރިމަންޓްގެ ޕްރިއެމްބަލާއި ސިޓީތަކުން އެނގެނީ ކޮންސެޝަންސްތައް ދީފައިވަނީ ސަރުކާރާ ދެކޮޅަށް ހިނގަމުންދިޔަ މައްސަލަތައް ކޯޓުން ބޭރުން ޙައްލުކުރާނެކަމުގެ ޔަޤީންކަމުގެ މައްޗަށް ކަމާއި، ގުޅުންހުރި ފަރާތެއްކަމަށް ބަލަންޖެހޭ ކުންފުންޏަކުން ދައުލަތާ ދެކޮޅަށް މައްސަލަ ހުށަހެޅުމަކީ އެގްރިމަންޓުގެ މައިގަނޑު މަޤްޞަދާ ޚިލާފުވުމެވެ. މައިގަނޑު މަޤްޞަދު ނެތިގޮސްފައިވާ މި އިސްތިސްނާ ޙާލަތުގައި އެގްރިމަންޓް އުވާލުމަކީ ޝަރުޢީ އަދި ޤާނޫނީ އުޞޫލަކާ ޚިލާފު ކަމެއް ނޫނެވެ.