2016/HC-A/133

ވަޒީފާއާބެހޭ ޓްރައިބިއުނަލުން، އެ ޢަމަލަކީ ސަރުކާރުގެ މުދާ އަމިއްލަކަމަކަށް ބޭނުންކުރުން ކަމަށާއި ދަރަޖަ 3 ގެ ކުށެއް ކަމަށް ބަލައި، މަޤާމު ދަށްކުރީ ގަވާއިދާ އެއްގޮތަށް ކަމަށް ކޮމިޝަނުން ސާބިތުކޮށްދީފައިވާތީ މުވައްޒަފު އެދުނު އަމުރުތައް ނުކުރެވޭނެ ކަމަށް ނިންމިއެވެ.

މިނިސްޓްރީ އޮފް ހެލްތުގެ ޑިރެކްޓަރެއްގެ މަޤާމުގައި ހުރި މުވައްޒަފަކު، ކްލޮރިން އާންމުންނަށް ދޫނުކުރާއިރު ސަޕްލައި ސެކްޝަނުގެ މުވައްޒަފުންނަށް ގުޅައިގެން ކްލޮރިން ހޯދައި ރައްޓެހިންނަށް ދިން މައްސަލައިގައި ސިވިލް ސަރވިސް ކޮމިޝަނުން އިސްލާޙީ ފިޔަވަޅެއްގެ ގޮތުން އެސިސްޓެންޓް ޑިރެކްޓަރގެ މަޤާމަށް ދަށްކުރިއެވެ. ތަޙްޤީޤުގައި އޭނާ އެކަމަށް އިޢުތިރާފުވެ، އެއީ ރަނގަޅަށް ކުރެވުނު ކަމެއް ނޫންކަމަށް އެއްބަސްވިއެވެ.

އިސްތިއުނާފުކުރި ފަރާތުން ބުނީ ފިޔަވަޅު އަޅާފައިވަނީ ޤާނޫނުއަސާސީގެ 43(ހ) އާއި 20(ހ) އާ ޚިލާފަށް ކަމަށާއި، ފިޔަވަޅު ޤާނޫނާ އެއްގޮތްކަން ސާބިތުކުރުމުގެ ޒިންމާ ވަޒީފާދޭ ފަރާތުން އަދާކޮށްފައި ނުވާ ކަމަށެވެ.

ސިވިލް ސަރވިސްގެ މުވައްޒަފަކު ސަރުކާރުގެ މުދާ އަމިއްލަ ކަމަކަށް ބޭނުންކުރުމުގެ ސަބަބުން މަޤާމު ދަށްކުރި ފިޔަވަޅަކީ ޤާނޫނާއި ގަވާއިދާ އެއްގޮތަށް އެޅި ފިޔަވަޅެއްތޯ، އަދި އެކަން ސާބިތުކުރުމުގެ ބުރަ ވަޒީފާދޭ ފަރާތަށް އަދާކުރެވިފައިވޭތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ސިވިލް ސަރވިސްގެ ޤާނޫނާއި ގަވާއިދުގައި ދަރަޖަ 3 ގެ ކުށަކަށް މަޤާމު ދަށްކުރުމުގެ ފިޔަވަޅު ހިމެނޭއިރު، ކޮމިޝަނުން ފިޔަވަޅު އަޅާފައިވަނީ ތަޙްޤީޤުކޮށް ގަވާއިދާއި ކޯޑް އޮފް ކޮންޑަކްޓާ ޚިލާފުވެފައިވާކަން ސާބިތުވުމުން ކަމަށް ލިޔެކިޔުންތަކުން އެނގޭތީ، ޓްރައިބިއުނަލުގެ ނިންމުމަށް ބަދަލު ގެންނަންޖެހޭ ސަބަބެއް ނެތްކަމަށް ނިންމިއެވެ.