2015/HC-A/389

ސިވިލް ކޯޓުން، 354,625 ރުފިޔާއަކީ ދަޢުވާލިބޭ ފަރާތުން ދައްކަންޖެހޭ ފައިސާކަން މަދަނީ މިންގަނޑުން ސާބިތުވާކަމަށް ކަނޑައަޅައި، އެ ފައިސާ 4 މަސްދުވަހުގެ ތެރޭގައި ތިންވަނަ ފަރާތަށް ލިބިދިނުމަށް ޙުކުމްކޮށްފައިވެއެވެ.

އެއްބަސްވުމެއްގެ ދަށުން ތިންވަނަ ފަރާތަކުން ނެގި ފައިސާ އެފަރާތަށް ދިނުމަށްޓަކައި ދަޢުވާކުރި ފަރާތުން 354,625 ރުފިޔާ އިސްތިއުނާފުކުރި ފަރާތާ ޙަވާލުކުރިކަން އޭނާ ސޮއިކުރި ލިޔުމަކުން އެނގެއެވެ. އެ ފައިސާ ތިންވަނަ ފަރާތަށް ޙަވާލުނުކުރާތީ ދަޢުވާކޮށްފައިވެއެވެ. އިސްތިއުނާފުކުރި ފަރާތުން ބުނީ، އެއީ އޭނާއާއި ތިންވަނަ ފަރާތާ ގުޅިގެން ކުރި ވިޔަފާރީގެ ފައިދާ ކަމަށާއި، ތިންވަނަ ފަރާތުގެ ބައި ދީފައިވާ ކަމަށެވެ.

އިސްތިއުނާފުކުރި ފަރާތުން ބުނީ، ދަށުކޯޓުން ބަލާފައިވަނީ އަނެއް ދެފަރާތުގެ ވާހަކައަށް އެކަނިކަމަށާއި، ޙުކުމަކީ ޝަރުޢީ އިޖުރާއާތާއި ޤާނޫނުއަސާސީގެ 20 ވަނަ މާއްދާގެ ރޫޙާ ޚިލާފު ޙުކުމެއްކަމަށެވެ.

ތިންވަނަ ފަރާތަކަށް ދިނުމަށްޓަކައި ޙަވާލުކުރި ފައިސާއަކީ ތިމާއަށް ލިބެންޖެހޭ ވިޔަފާރީގެ ފައިދާކަމަށް ބުނާ ފަރާތުން އެކަން ސާބިތުނުކޮށް، އެ ފައިސާ އެ ތިންވަނަ ފަރާތަށް ދޭން ދަށުކޯޓުން ކުރި ޙުކުމް ޞައްޙަތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފައިސާއަކީ ވިޔަފާރީގެ ފައިދާކަމަށް ބުނުން ފިޔަވައި އެކަން ސާބިތުކޮށްދޭނެ ހެއްކެއް ނުވަތަ ޤަރީނާއެއް އިސްތިއުނާފުކުރި ފަރާތުން ދަށުކޯޓުގައި ހުށަހަޅާފައިނުވާތީ، ދަށުކޯޓުގެ ޙުކުމަށް ބަދަލު ނުގެނެވެއެވެ.