މޯލްޑިވްސް ޕޮލިސް ސަރވިސް ވ. ފެކްޓް މޯލްޑިވްސް ޕވޓ ލޓޑ

ސިވިލް ކޯޓުން ދަޢުވާ ސާބިތުވާކަމަށް ކަނޑައަޅައި 6 މަސްދުވަހުގެ ތެރޭގައި 651,894 ރުފިޔާ ދެއްކުމަށް ޕޮލިސް ސަރވިސްއަށް އަންގައި ޙުކުމްކުރިއެވެ.

2011 ވަނަ އަހަރުގެ ސެޕްޓެމްބަރުން ޑިސެމްބަރާ ހަމައަށް ޕޮލިސް ސްޓޭޝަންތަކުގެ ބޭނުމަށް ކުރި ލޯންޗު ދަތުރުތަކުގެ އަގުގެ ގޮތުގައި 651,894 ރުފިޔާ ހޯދުމަށް ފެކްޓް މޯލްޑިވްސް ޕްރައިވެޓް ލިމިޓެޑުން ދަޢުވާކުރި މައްސަލައެކެވެ. ޕޮލިހުން ބުނީ ދަތުރުގެ އަގަށްވާވަރަށް ތެޔޮ ދިނުމަށް އެއްބަސްވެގެން ކުރި ދަތުރުތަކެއް ކަމަށެވެ.

ދައުލަތުން ބުނީ ދައުލަތުން ހުށަހެޅި ހެކިބަހާއި ލިޔެކިޔުންތަކަށް ރިޢާޔަތްނުކޮށް ޙުކުމްކުރި ކަމަށާއި، ޖޫރިމަނާ (ޝަރުޠު ޖަޒާއީ) އާއި ވަކީލު ފީ ދެއްކުމަށް އަމުރުކުރުން ސުޕްރީމް ކޯޓާއި ހައިކޯޓުގެ ސާބިގާތަކާ ޚިލާފު ކަމަށެވެ. އިސްތިއުނާފު ރައްދުވާ ފަރާތުން ބުނީ އިސްތިއުނާފު ކުރީ މުއްދަތު ފާއިތުވުމަށްފަހު ކަމަށެވެ.

ލޯންޗު ދަތުރުތަކުގެ އަގުގެ ގޮތުގައި 651,894 ރުފިޔާ މޯލްޑިވްސް ޕޮލިސް ސަރވިސްއިން ދައްކަންޖެހޭކަން ސާބިތުވާކަމަށް ސިވިލް ކޯޓުން ކަނޑައެޅީ ދެފަރާތުން ހުށަހެޅި ހެކި ރަނގަޅަށް ވަޒަންކޮށް ތަޤްޔީމްކޮށްތޯ؛ އަދި މުއްދަތު ފާއިތުވުމަށްފަހު ހުއްދަ ލިބިގެން ކުރި އިސްތިއުނާފު ކުރިޔަށް ގެންދެވޭތޯ.

ދަށުކޯޓުގެ ޙުކުމް ބާޠިލު

ދަޢުވާކުރާ ފަރާތުގެ ހެކިންނަކީ އަމިއްލަ މަޞްލަޙަތު ހުރި ފަރާތްތަކެއްކަމާއި، އެ ހެކިބަހަށް ބާރުދޭ ކިތާބީ ހެއްކެއް ނެތްކަމާއި، ބިލުތަކަކީ ކާފީ ހެއްކެއް ނޫންކަމާއި، ޕޮލިހުގެ ހެކިބަހަށް ހުއްދައަށް އެދުނު ސިޓީތަކާއި ތެޔޮގެ ރަސީދުތަކުން ބާރުދޭތީ، ފައިސާ ދައްކަންޖެހޭކަމަށް ބެލެވެން ނެތެވެ.