2015/HC-A/269

ސިވިލް ކޯޓުން، ޢިމާރާތް އެޅުމަށް ހިނގި ޚަރަދާއި، ދީފައިވާ ފައިސާއިން ކުލި އުނިކޮށް ބާކީވާ ފައިސާ ހިމެނޭގޮތަށް ޖުމްލަ 1,100,671.17 ރުފިޔާ ދަޢުވާލިބުނު ފަރާތުން ދައްކަންޖެހޭކަމަށް ޙުކުމްކުރިއެވެ.

ގޯއްޗެއް ވިއްކުމާއި ގަތުމާބެހޭ އެއްބަސްވުމެއްގެ ދަށުން ގަތް ފަރާތުން އަގުގެ ބައެއް ދީ، ގޯތީގައި 3 ބުރީގެ ޢިމާރާތެއް ކުރުމަށްފަހު، ވިއްކި ފަރާތުން އެ ގޯތި ތިންވަނަ ފަރާތަކަށް ވިއްކާލުމުން، ދީފައިވާ ފައިސާއާއި ޢިމާރާތުގެ ޚަރަދާއި ގެއްލުން ހޯދުމަށް ވިއްކި ފަރާތްތަކުގެ ތެރެއިން އެއް ފަރާތެއްގެ މައްޗަށް އެކަނި ދަޢުވާކުރި މައްސަލައެކެވެ. އެއްބަސްވުމުގައި ވިއްކާ ފަރާތުގެ ގޮތުގައި އޭނާއާއި އޭނާގެ ތިން ދަރިން ސޮއިކޮށްފައިވެއެވެ.

އިސްތިއުނާފުކުރި ފަރާތުން ބުނީ، އެއްބަސްވުމުގައި ސޮއިކުރި ހުރިހާ ފަރާތެއް ހިމަނައިގެން ދަޢުވާކުރަން ދަށުކޯޓުގައި އެދުނު ނަމަވެސް އެ ފަރާތްތައް ނުހިމަނައި މައްސަލަ ބެލުމާއި، ޢިމާރާތް ކުރީ އެހެން އެއްބަސްވުމެއްގެ ދަށުން ކަމަށާއި، ހުއްދައާ ޚިލާފަށް ކަމަށާއި، 2009/HC-A/19 ޤަޟިއްޔާއާ ޚިލާފަށް ނިންމި ކަމަށެވެ.

ގޯއްޗެއް ވިއްކުމާއި ގަތުމާބެހޭ އެއްބަސްވުމެއްގައި ވިއްކާ ފަރާތުގެ ގޮތުގައި ގިނަ ފަރާތްތަކެއް ސޮއިކޮށްފައިވާއިރު، އެއިން އެއް ފަރާތެއްގެ މައްޗަށް އެކަނި ކުރާ ދަޢުވާއެއް ބަލައި ނިންމުން ޞައްޙަވޭތޯ.

ދަށުކޯޓުގެ ޙުކުމް ބާޠިލު؛ ހުރިހާ ފަރާތެއް ހިމަނައިގެން ދަޢުވާ އަލުން ހުށަހެޅިދާނެ

ގޯތި ވިއްކާ ފަރާތުގެ ގޮތުގައި ތިން ދަރިންވެސް ސޮއިކޮށްފައިވާކަމާއި، ގޯތީގެ މިލްކުވެރި ފަރާތަކީ އިސްތިއުނާފުކުރި ފަރާތް އެކަނި ނޫންކަން ލިޔެކިޔުންތަކުން އެނގޭތީ، އެއްބަސްވުމުގެ ހުރިހާ ބައިވެރިން ހިމަނަންޖެހޭ ޢާންމު އުޞޫލުގެ މަތިން ދަށުކޯޓުގެ ޙުކުމް ބާޠިލުކުރިއެވެ.