2015/HC-A/390

ދަރަވަންދޫ މެޖިސްޓްރޭޓް ކޯޓުން، ގޯތީގެ ވެރިފަރާތް ވިއްކުމަށް އިންކާރުކުރާތީ ޤަވާއިދުގެ 9(ހ) އާއި މިލްކުވެރިކަން ބަދަލުކުރުމުގެ ޤާނޫނުގެ 1(ށ) ގެ ދަށުން ފުރިހަމަކުރަންޖެހޭ އިޖުރާއާތާއި އީޖާބާއި ޤަބޫލު ފުރިހަމަނުވާތީ، ވިއްކުމުގެ މުޢާމަލާތް ފުރިހަމަވެފައިވާކަމަށް ކަނޑައަޅައިނުދެވޭނެކަމަށް ޙުކުމްކުރިއެވެ.

ގޯއްޗަކާއި އޭގައިވާ ޢިމާރާތްތައް 100,000 ރުފިޔާއަށް ވިއްކުމަށް ދެފަރާތް އެއްބަސްވެފައިވާކަމަށް ބުނެ، ގަނެވިއްކުމުގެ މުޢާމަލާތް ޝަރީޢަތް މެދުވެރިކޮށް ފުރިހަމަކުރުމަށް ގަންނަ ފަރާތުން ހުށަހެޅިއެވެ. މީގެ ކުރިން ވިއްކުމަށް ހުށަހެޅި މައްސަލައެއް ޓެކްސް ނުދެއްކުމުން ނިމުމަކަށް ނާދެ، ހައިކޯޓުގެ 2011/HC-A/21 ޤަޟިއްޔާއިން އަލުން ހުށަހެޅުމުގެ ޙައްޤު ދީފައިވެއެވެ.

ގަންނަ ފަރާތުން ބުނީ ދަށުކޯޓުން ގުޅުމެއް ނެތް ނުކުތާތަކަށް ބިނާކޮށް ހަމްދަރުދީގެ މައްޗަށް ނިންމާފައިވާކަމަށާއި، ޤަވާއިދުގެ 9(ހ) މާނަކޮށްފައިވަނީ ރަނގަޅަށް ނޫންކަމަށާއި، 2011/HC-A/21 ޤަޟިއްޔާއާ ޚިލާފުކަމަށާއި، މިލްކުވެރިކަން ބަދަލުކުރުމުގެ ޤާނޫނުގެ 1(ށ) އަކީ ގޯތި ވިއްކުމަށް ހިނގާ މާއްދާއެއް ނޫންކަމަށާއި، ކޮންޓްރެކްޓާބެހޭ ޤާނޫނުގެ 25 ވަނަ މާއްދާގެ ދަށުން ޢަމަލުކުރަން އަމުރުކުރަންވީކަމަށެވެ.

ގޯއްޗެއް ވިއްކުމަށް ޝަރީޢަތުން ބޭރުގައި ދެފަރާތް އެއްބަސްވެފައިވާއިރު، ގޯތީގެ ވެރިފަރާތް ވިއްކުމަށް އިންކާރުކުރާ ޙާލަތުގައި ގަނެވިއްކުމުގެ މުޢާމަލާތް ޝަރީޢަތް މެދުވެރިކޮށް ފުރިހަމަކުރުމަށް ލާޒިމްކުރެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ގަނެވިއްކުމުގެ މުޢާމަލާތް ފުރިހަމަވާނީ ޝަރީޢަތް މެދުވެރިކޮށް ހިންގުމުން ކަމަށްވާއިރު، ވެރިފަރާތް އިންކާރުކުރާ ޙާލަތުގައި ޝަރީޢަތުން މުޢާމަލާތް ފުރިހަމަކުރުމަށް ލާޒިމްކުރެވޭނެ ހަމައެއް ނެތެވެ. ދެއްކި ފައިސާއެއް ވާނަމަ އެއީ ވަކި މައްސަލައެއްގެ ގޮތުގައި ހޯދިދާނެ ފައިސާއެކެވެ.