2016/HC-A/159

ސިވިލް ކޯޓުން (C/2015-2017/Cv) މުދަލުގެ އަގު ދެއްކުމަށް ޙުކުމްކޮށް، އަގު އަދާކުރާނެ މުއްދަތަކާމެދު ދެފަރާތް އެއްބަސްވެފައިވާކަން ނޭނގޭތީ 2013/SC-A/27 ޤަޟިއްޔާއާ މި މައްސަލައިގެ ޙާލަތު ތަފާތުކަމަށް ބުނެ، ޖޫރިމަނާ ނަގައިދެވޭނެ ހަމައެއް ނެތްކަމަށް ކަނޑައެޅިއެވެ.

ޓިމްބަރ ހައުސް ޕްރައިވެޓް ލިމިޓެޑުން ލޯމާ މާމިގިލި ރިސޯޓް އެންޑް ސްޕާ ޕްރައިވެޓް ލިމިޓެޑަށް ޕާޗޭސް އޯޑަރތަކާ އެއްގޮތަށް 6 ފަހަރެއްގެ މަތިން މުދާ ވިއްކާ، އިންވޮއިސްތައް ފޮނުވިއެވެ. އިންވޮއިސްތަކުގައި 30 ދުވަހުގެ ތެރޭގައި ފައިސާ ނުދައްކައިފިނަމަ ލަސްވާ ކޮންމެ ދުވަހަކަށް 0.5% ޖޫރިމަނާ ކުރެވޭނެ ކަމަށް ލިޔެފައިވިއެވެ. މުދަލުގެ އަގާއި ޖޫރިމަނާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، އިންވޮއިސްތަކުގައި ޖަޒާއީ ޝަރުޠެއް ހިމެނުމަކީ ދިވެހިރާއްޖޭގައި އިސްތިޤްރާރުވެފައިވާ ކަމެއްކަމަށް 2013/SC-A/27 ގައި ކަނޑައަޅާފައިވާއިރު، ޖޫރިމަނާ ނަގައި ނުދިނުމަކީ އެ ޤަޟިއްޔާގައިވާ އުޞޫލާ ޚިލާފު ކަމެއް ކަމަށެވެ. އިސްތިއުނާފު ރައްދުވި ފަރާތުން ބުނީ، ޖޫރިމަނާގެ ޝަރުޠަށް އެއްބަސްވެފައި ނުވާ ކަމަށެވެ.

މުދާ ޙަވާލުކުރުމަށްފަހު ފޮނުވާ އިންވޮއިސްގައި ހިމަނާފައިވާ ޖޫރިމަނާގެ ޝަރުޠު (ޝަރުޠު ޖަޒާއީ)، ގަތް ފަރާތުން އެއަށް އެއްބަސްވެފައިނުވާ ޙާލަތުގައި އެ ފަރާތުގެ މައްޗަށް ލާޒިމްކުރެވޭނެތޯ؛ އަދި ސުޕްރީމް ކޯޓުގެ 2013/SC-A/27 ޤަޟިއްޔާ މި މައްސަލައަށް ތަޠްބީޤުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ގަނެވިއްކުމުގެ އެއްބަސްވުން އުފެދުނީ މުދަލާ ޙަވާލުވި ވަގުތުގައި ކަމާއި، އޭރު އަގު ދައްކާނެ ގޮތަކާމެދު އެއްބަސްވުމެއް ނެތުމުން، ފަހުން ފޮނުވި އިންވޮއިސްގެ ޖޫރިމަނާ ޝަރުޠު ލާޒިމްކުރުމަކީ ރުހުމުގެ ބޭރުން ކުރެވޭ ކަމެކެވެ. ޝަރުޠު ޖަޒާއީގެ މައުޟޫޢުގައި ފަހުން ނިންމި 2015/SC-A/16 ޤަޟިއްޔާއަށް ހައިކޯޓުން ޢަމަލުކުރަންޖެހޭއިރު، 2013/SC-A/27 ގައި ލިޔުމުން އެއްބަސްވުމެއް އޮތުމުން އެ ޤަޟިއްޔާ މިއާ ތަފާތެވެ.