2015/HC-A/117

އެ އެއްބަސްވުމަކީ ޤާނޫނާއި ގަވާއިދާ ޚިލާފު އެއްބަސްވުމެއްކަމަށް ފާހަގަ ނުކުރެވޭތީ، އެ އެއްބަސްވުން ބާޠިލުކުރުމަށް އަމުރުކޮށް ނުދެވޭނެކަމަށް މަރަދޫ މެޖިސްޓްރޭޓް ކޯޓުން ޙުކުމްކުރިއެވެ.

ސ.މަރަދޫގެ ސްލިޕްވޭ ހިމެނޭ ބިން 1998 އިން ފެށިގެން ކުއްޔަށް ދީފައިވާ ފަރާތަށް، އިތުރު އިންވެސްޓްމަންޓް ރިކަވަރ ކުރުމަށްޓަކައި 2011 ގައި އައްޑޫ ސިޓީ ކައުންސިލުން ކުލީގެ މުއްދަތު 25 އަހަރަށް އިތުރުކޮށްދީ އެއްބަސްވުމެއް ވެވުނެވެ. އިސްތިއުނާފުކުރި ފަރާތުން އެ އެއްބަސްވުން ބާޠިލުކޮށްދިނުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ބިން ދޫކޮށްފައިވަނީ ބީލަމުގެ އުޞޫލާއި ބިން ދޫކުރުމާބެހޭ ގަވާއިދުގެ 3 އަދި 5 ވަނަ މާއްދާ، މާލިއްޔަތު ގަވާއިދުގެ 6.05(ރ) އާ ޚިލާފަށް، ރޭމްޕަށް ވަކި ކުއްޔެއް ނުކަނޑައަޅައި، ކޮރަޕްޝަނަށް މަގުފަހިވާ ގޮތަށް ކަމަށެވެ.

ދައުލަތުގެ ބިމެއް ކުރިން ކުއްޔަށް ދީފައިވާ ފަރާތަކަށް 25 އަހަރަށް ކުލީގެ މުއްދަތު އިތުރުކޮށްދީ އައްޑޫ ސިޓީ ކައުންސިލާ ދެމެދު ވެވުނު އެއްބަސްވުމަކީ ބިން ދޫކުރުމާބެހޭ ގަވާއިދާއި ދައުލަތުގެ މާލިއްޔަތު ގަވާއިދާ ޚިލާފު، ބާޠިލު އެއްބަސްވުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އެއްބަސްވުމަކީ ކުރިން ދޫކުރި ބިމެއްގެ މުއްދަތު ކަމާބެހޭ ފަރާތްތަކުގެ ލަފައާއި ހުއްދައާއެކު އިތުރުކުރުމަށް ވެވުނު އެއްބަސްވުމެއްކަމާއި، ދެވަނަ ފަރާތަކަށް ކުއްޔަށްދިނުމުގެ މާއްދާ މާލިއްޔަތު ގަވާއިދާ ޚިލާފު ނުވާކަމާއި، ކޮރަޕްޝަނެއް ނުހިނގާކަމަށް އޭސީސީން ނިންމާފައިވާތީ، އެއްބަސްވުން ބާޠިލެއް ނޫނެވެ.