ބޭންކް އޮފް މޯލްޑިވްސް ވ. ޝެހެނާޒް އަޙްމަދު ރިޟާ

ލޯނު ނެގި ފަރާތުން ޤަވާޢިދުން ފައިސާ ދައްކަމުން ދާތީއާއި ލޯނުގެ ހުރިހާ ޑިސްބާސްމަންޓެއް ބޭންކުން ދޫކުރީ ޝަރުޠުތައް ބެލުމަށްފަހު ކަމަށްވާތީ، ލޯނު ކެންސަލްކޮށް އެއްފަހަރާ ފައިސާ ދެއްކުމަށް އަންގާނެ ތަނެއް ނެތްކަމަށް ސިވިލް ކޯޓުން ޙުކުމްކުރިއެވެ.

ގެރެންޓަރުގެ ނަމުގައިވާ ގޯތީގައި 10 ބުރީގެ ޢިމާރާތެއް ކުރުމަށް 12،400،000 ރުފިޔާގެ ޑިމާންޑް ލޯނެއް ގޯތި ރަހުނުކޮށްގެން ބޭންކުން ދޫކުރިއެވެ. އިންސްޕެކްޝަންތަކުން ލޯނުގެ ފައިސާ ޢިމާރާތަށް ޚަރަދު ނުކުރާކަން ފާހަގަކޮށް، ބޭންކުން ލޯނު ކެންސަލްކޮށް 15 ދުވަހުގެ ތެރޭގައި ފައިސާ ދެއްކުމަށް އެންގުމަށްފަހު ދަޢުވާކުރިއެވެ.

ބޭންކުން ބުނީ ލޯނު ދޫކުރި މަޤްޞަދާ ޚިލާފުވިކަން ދައްކާ ލިޔެކިޔުމާއި ހެކި، ލޯނު އެގްރީމެންޓާއި ރަހުނު އެގްރީމެންޓަށް ސިވިލް ކޯޓުން ރިޢާޔަތް ނުކުރާކަމަށާއި، ހަމައެކަނި ބެލީ އެއް ކަމަކަށް ކަމަށެވެ.

ލޯނު ނެގި ފަރާތުން ވަގުތަށް ފައިސާ ދައްކަމުން ދިޔަނަމަވެސް، ލޯނުގެ ފައިސާ ލޯނުދޫކުރި މަޤްޞަދާ ޚިލާފަށް ބޭނުންކުރުމުން ބޭންކަށް ލޯނު ފެސިލިޓީ ކެންސަލްކޮށް ބާކީ ފައިސާ އެއްފަހަރާ ދެއްކުމަށް އެދެވޭތޯ.

ދަށުކޯޓުގެ ޙުކުމް ބާޠިލު؛ ލޯނު ފެސިލިޓީ ކެންސަލްކަމަށް ކަނޑައަޅައި ފައިސާ ދެއްކުމަށް އަންގައިފި

ޢާންމު ޝަރުޠުތަކުގެ 2.13 ގެ ދަށުން ޝަރުޠަކާ ޚިލާފުވުމުން ލޯނު ބާޠިލުކުރުމުގެ ޙައްޤު ބޭންކަށް ލިބެއެވެ. ލޯނުގެ ފައިސާ މަޤްޞަދާ ޚިލާފަށް ބޭނުންކުރިކަން އިންސްޕެކްޝަންތަކުން އެނގި، ލޯނު ނެގި ފަރާތުން އިންކާރުނުކުރާތީ، ޤަވާޢިދުން ފައިސާ ދެއްކި ނަމަވެސް ދަށުކޯޓުގެ ޙުކުމަށް ބަދަލު ގެންނަންޖެހެއެވެ.