އާމިނަތު ޝާން ޚުޝީ ވ. ުޙައްމަދު ސަޢީދު ޕެރެޑައިސް

ފުވައްމުލަކު މެޖިސްޓްރޭޓް ކޯޓުން، ކުއްޔަށް ހިފި ފަރާތް އެއްބަސްވުމާ ޚިލާފުވިކަން ސާބިތުނުވާތީ، އެއްބަސްވުން ބާޠިލުކަމަށް ކަނޑައަޅާނެ ޝަރުޢީ އަދި ޤާނޫނީ ހަމައެއް ނެތްކަމަށް ކަނޑައަޅައި، އެއްބަސްވުމަށް އިޙްތިރާމްކުރުމަށް ދެފަރާތަށް އެންގި.

ރެސްޓޯރެންޓެއް ހަދާ ހިންގުމަށް ބިމެއް 9 އަހަރާއި 9 މަހަށް ކުއްޔަށް ދިނުމަށް 2008 ވަނަ އަހަރު ދެފަރާތް އެއްބަސްވި. ކުއްޔަށް ހިފި ފަރާތް އެއްބަސްވުމާ ޚިލާފުވިކަމަށް ބުނެ، އެއްބަސްވުމުގެ 16 ވަނަ މާއްދާގެ ދަށުން އެއްބަސްވުން ބާޠިލްކޮށް ތަން ހުސްކޮށްދިނުމަށް ބިމުގެ ވެރިފަރާތުން ދަޢުވާކުރި.

އިސްތިއުނާފުކުރި ފަރާތުން ބުނީ، ޢިމާރާތުގެ ޚަރަދުގެ ލިޔުމުގެ ކޮޕީ ދިނުމާއި ޚަރަދު ކޯޓުގައި ރަޖިސްޓްރީކުރުން ކުއްޔަށް ހިފި ފަރާތުން ފުރިހަމަނުކުރާއިރު، ޚިލާފުނުވާކަމަށް ހެކިންގެ ބަހަށް ބަލައި ނިންމުމަކީ ޤާނޫނުއަސާސީގެ 142 ވަނަ މާއްދާގެ ރޫޙާ ޚިލާފު ކަމަށާއި، ޚަރަދުގެ ޙައްދާ ބެހޭ އެއްބަސްވުމުގެ 9 ވަނަ މާއްދާއާ ޚިލާފުވުމަށް ރިޢާޔަތްނުކުރުމަކީ ކޮންޓްރެކްޓާބެހޭ ޤާނޫނުގެ 19 އަދި 20 ވަނަ މާއްދާއާ ޚިލާފު ކަމަށެވެ.

ބިމެއް ކުއްޔަށް ދިނުމުގެ އެއްބަސްވުމުގެ ބައެއް މާއްދާތަކާ (ޢިމާރާތުގެ ޚަރަދުގެ ލިޔުމުގެ ކޮޕީ ދިނުމާއި ޚަރަދު ކޯޓުގައި ރަޖިސްޓްރީކުރުން) ކުއްޔަށް ހިފި ފަރާތް ޚިލާފުވިކަމަށް ބުނެ، އެއްބަސްވުން ބާޠިލުކަމަށް ކަނޑައަޅާނެ ޝަރުޢީ އަދި ޤާނޫނީ އަސާސެއް އޮތްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހައިކޯޓުން ދެކުނީ، އެއްބަސްވުމުގެ 16 ވަނަ މާއްދާގެ ދަށުން ބާޠިލުކުރެވޭނީ ޚިލާފުވުން ސާބިތުވެ އެކަން ޙައްލުނުވުމުން ކަމަށާއި، ކުލި ނުދެއްކުމެއް، ދީނާ ޚިލާފު ކަމެއް ނުވަތަ ޢިމާރާތަށް ގެއްލުމެއް ސާބިތުނުވާ ކަމަށާއި، ޚަރަދުގެ ލިޔުމަށް އެދުނީ 2013 ގައި ކަމަށާއި، އެ ލިޔުން ދިނުމަށް އިންކާރުކުރިކަމުގެ ހެއްކެއް ނެތް ކަމަށާއި، އެކަން ޙައްލުކުރުމަށް އެކަށީގެންވާ މަސައްކަތެއް ނުކުރާތީ އެއްބަސްވުން ބާޠިލުކުރާނެ ހަމައެއް ނެތް ކަމަށެވެ.