ޢަލީ ރަޝީދު ވ. މުޙައްމަދު އިބްރާހީމް ދީދީ

ސިވިލް ކޯޓުން ތަން ހުސްކޮށް ޙަވާލުކުރުމަށާއި، ފާއިތުވި މުއްދަތުގެ ކުލި 36،290.32 ރުފިޔާ ދެއްކުމަށާއި، ތަން ހުސްކުރާ ހިނދާ ހަމައަށް މަހަކު 75،000 ރުފިޔާ ކުލި ދެއްކުމަށް ޙުކުމްކުރިއެވެ.

ކުރީގެ ވެރިފަރާތާ ވެފައިވާ އެއްބަސްވުމެއްގެ ދަށުން، މަހަކު 25،000 ރުފިޔާއަށް، ކުރިއަށް އޮތް އެތައް އަހަރެއްގެ މުއްދަތަކަށް ގޯއްޗެއްގައިވާ ފިހާރައެއް ކުއްޔަށް ހިފައި އެޑްވާންސް ދައްކާފައިވެއެވެ. އޭގެފަހުން ގޯތި ލާޖައްސައި މިލްކުވެރިކަން އިސްތިއުނާފު ރައްދުވާ ފަރާތަށް ބަދަލުވުމުން، އެ ފަރާތުން ކުލީގެ އެއްބަސްވުން ބާޠިލުކަމަށް އަންގައި، މަހަކު 75،000 ރުފިޔާގެ ކުއްޔަކަށް ހުށަހަޅައި، ތަން ހުސްކުރުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ލާޖެއްސުމުގައި ކުރީގެ ވެރިފަރާތުން ކުލީގެ އެއްބަސްވުމަށް އިޙްތިރާމްކުރުމުގެ ޝަރުޠެއް ކުރި ކަމަށާއި، އެކަން ސާބިތުކުރުމަށް ހުށަހެޅި ހެކިބަސް ނުނެގި ކަމަށާއި، ސަބަބެއްނެތި ކުލި ބޮޑުކުރީކަމަށެވެ.

ކުއްޔަށް ދީފައިވާ ޢިމާރާތެއްގެ މިލްކުވެރިކަން ލާޖެއްސުމުގެ ސަބަބުން އެހެން ފަރާތަކަށް ބަދަލުވުމުން، ކުރީގެ ވެރިފަރާތާ ވެފައިވާ ކުލީގެ އެއްބަސްވުން ބާޠިލުވޭތޯއާއި، އަލަށް މިލްކުވެރިވި ފަރާތަށް އެއްބަސްވުމާ ޚިލާފަށް ކުލި ބޮޑުކޮށް ތަން ހުސްކުރުވިދާނެތޯ؛ އަދި ކުރީގެ ވެރިފަރާތުގެ ހެކިބަސް ނުނެގުމަކީ ރަނގަޅު ނިންމުމެއްތޯ.

ދަށުކޯޓުގެ ޙުކުމް ބާޠިލު

ހެކިބަސް ނުނެގި ސަބަބުތައް ރަނގަޅު ނޫނެވެ. ލާޖެއްސުމުގެ އެއްބަސްވުމާ ކުލީގެ އެއްބަސްވުން ފުށުނާރައެވެ. ފިހާރަ ކުއްޔަށް ދީފައިވާކަން އަލަށް މިލްކުވެރިވި ފަރާތަށް އެނގޭނެއެވެ. 2015/SC-A/06 ގެ އުޞޫލުން އަލަށް މިލްކުވެރިވި ފަރާތް ކުލީގެ އެއްބަސްވުމަށް ބަރޯސާވާއިރު، އެއްފަރާތުން ބާޠިލުކުރުމަކީ ޞައްޙަ ކަމެއް ނޫނެވެ.