ޢަލީ އަޙްމަދު ދީދީ ވ. ޕްރޮސިކިއުޓަރ ޖެނެރަލް

ފުވައްމުލަކު މެޖިސްޓްރޭޓް ކޯޓުން ކުރީގެ ބަންދު އަމުރުތައް R1C/2021/14 އަމުރުން 10:59 ގައި ބާޠިލުކޮށް، 11:00 ގައި CA/2021/129-R1C އަމުރުން ޚާއްޞަ ޤާނޫނުގެ ދަށުން ޝަރީޢަތް ނިމެންދެން ރިމާންޑް ޖަލެއްގައި ބަންދުކުރުމަށް އަމުރުކުރިއެވެ.

ކުޑަކުއްޖަކަށް ޖިންސީ ގޯނާކުރިކަމުގެ ދަޢުވާގައި ޖިނާއީ އިޖުރާއަތުގެ ޤާނޫނުގެ ދަށުން ޝަރީޢަތް ނިމެންދެން ބަންދުކޮށްފައިވާ ތުހުމަތުކުރެވޭ ފަރާތުގެ ބަންދު، ޢަބްދުސް ސަލާމް ޤަޟިއްޔާއަށްފަހު ޚާއްޞަ ޤާނޫނުގެ ދަށުން ދެމެހެއްޓުމަށް ޕްރޮސިކިއުޓަރ ޖެނެރަލް ހުށަހެޅިއެވެ.

އިސްތިއުނާފުކުރި ފަރާތުން ބުނީ ދޫކޮށްނުލައި އަލުން ބަންދުކުރީ ކަމަށާއި، ކޯޓަކަށް އެކޯޓުގެ އަމުރު ބާޠިލު ނުކުރެވޭނެ ކަމަށާއި، ޝަރީޢަތުގެ މަރުޙަލާގައި ޚާއްޞަ ޤާނޫނުގެ ދަށުން ބަންދަށް އެދުމުގެ ބާރު ޕްރޮސިކިއުޓަރ ޖެނެރަލަށް ނެތް ކަމަށެވެ. ދައުލަތުން ބުނީ ޢަބްދުސް ސަލާމް ޤަޟިއްޔާއާ އެއްގޮތަށް އަދި ގަވާއިދުގެ 55 ވަނަ މާއްދާއާ އެއްގޮތަށް ކުރި ކަމެއް ކަމަށާއި ޖިހާދު ޤަޟިއްޔާ މި މައްސަލައަށް ނުގުޅޭ ކަމަށެވެ.

ސުޕްރީމް ކޯޓުގެ ޢަބްދުސް ސަލާމް ޤަޟިއްޔާއަށް ރިޢާޔަތްކޮށް ޖިނާއީ އިޖުރާއަތުގެ ޤާނޫނުގެ ދަށުން ނެރެފައިވާ ބަންދު އަމުރުތައް ދަށު ކޯޓުން ބާޠިލްކޮށް، ހަމަ އެދުވަހު ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 30 ވަނަ މާއްދާގެ ދަށުން ޝަރީޢަތް ނިމެންދެން ބަންދުކުރުމަށް ނެރުނު އަމުރު ޤާނޫނާ އެއްގޮތްތޯ؛ ޝަރީޢަތުގެ މަރުޙަލާގައިވާ މީހެއްގެ ބަންދަށް އެ ޤާނޫނުގެ ދަށުން ޕްރޮސިކިއުޓަރ ޖެނެރަލަށް އެދެވޭތޯ އަދި ކޯޓަކަށް އެކޯޓުގެ އަމުރު ބާޠިލުކުރެވޭތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް (އަޣުލަބިއްޔަތުން)

އަޣުލަބިއްޔަތުގެ ރައުޔަކީ ޢާންމު ޤާނޫނުގެ ދަށުން ބަންދުގައި ހުރުމަކީ އިޖުރާއީ ގޯހެއް ކަމާއި އެ ގޯސް ރަނގަޅުކޮށް ޚާއްޞަ ޤާނޫނުގެ ދަށުން ބަންދު ދެމެހެއްޓުމުން ބަންދަށް އަސަރެއް ނުކުރާ ކަމާއި، ޕްރޮސިކިއުޓަރ ޖެނެރަލަށް އެގޮތަށް އެދެވޭ ކަމާއި، ކޯޓަށް އެކޯޓުގެ އަމުރު މުރާޖަޢާކޮށް ބާޠިލުކުރެވޭ ކަމެވެ. ފަނޑިޔާރު މުޙައްމަދު ނިޔާޒްގެ ޚިލާފު ރައުޔަކީ ކުރީގެ އަމުރުތައް ބާޠިލުކޮށް ދޫކޮށްލުމުން އޭނާ ބަންދުގައި ނެތްތީ ޚާއްޞަ ޤާނޫނުގެ 30 ވަނަ މާއްދާގެ އިޖުރާއަތު ހިންގޭނެ ބިންގާއެއް ނެތް ކަމަށާއި، އަމުރު ބާޠިލުކުރަންޖެހޭ ކަމަށެވެ.