ޢަލީ އާދަމް ވ. ފޯވޭ މޯލްޑިވްސް ޕްރައިވެޓް ލިމިޓެޑް

ދެ ޤަޟިއްޔާ ސިވިލް ކޯޓުން އެކުއެކީގައި ބަލައި، 1833/Cv-C/2011 ގައި އެއްބަސްވުން ބާޠިލުވެއްޖެކަމަށް ކަނޑައަޅާނެ ތަނެއް ނެތްކަމަށް ކަނޑައެޅިފައިވާތީ، މި ދަޢުވާގެ މައުޟޫޢާމެދު ގޮތެއް ކަނޑައެޅިފައިވާކަމަށް ޙުކުމްކުރިއެވެ.

ކުއްޔަށް ދިން ފަރާތް ބުނީ ކުއްޔަށް ހިފި ކުންފުނިން އެޕާޓްމަންޓެއްގެ ކުލި އެއްބަސްވުމާ އެއްގޮތަށް ނުދައްކާތީ އެއްބަސްވުމާ ޚިލާފުވެއްޖެ ކަމަށެވެ. ކުއްޔަށް ހިފި ފަރާތުން ވަކި ދަޢުވާއެއް (1833/Cv-C/2011) ކޮށް، އެއްބަސްވުން ބާޠިލް ނުވާކަމަށް ކަނޑައަޅައިދިނުމަށް އެދުނެވެ.

އިސްތިއުނާފުކުރި ފަރާތުން ބުނީ ހުށަހެޅި ހެކި އަދި ކުއްޔަށް ހިފި ފަރާތުގެ އިޢުތިރާފަށް ރިޢާޔަތްނުކުރާކަމަށާއި، މަހުން މަހަށް ކުލި ނުދައްކާ ކޮންމެ ފަހަރަކީ ތަކުރާރުކޮށް އެއްބަސްވުމާ ޚިލާފުވުމެއްކަމަށް ބެލުމަށް 2011/HC-A/132 ތަޠުބީޤުނުކުރުމަކީ ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފު ކަމެއްކަމަށެވެ.

ކުލީގެ އެއްބަސްވުމާ ކުއްޔަށް ހިފި ފަރާތުން ޚިލާފުވެފައިވާކަމަށް ކަނޑައަޅައި ގެއްލުމުގެ ބަދަލު ހޯދައިދިނުމަށް ކުރި ދަޢުވާގެ މައުޟޫޢާމެދު، އެކުއެކީގައި ހިންގި އެހެން ޤަޟިއްޔާއަކުން ގޮތެއް ކަނޑައެޅިފައިވާކަމަށް ސިވިލް ކޯޓުން ކުރި ޙުކުމަށް ބަދަލު ގެންނަންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދެ ޤަޟިއްޔާ އެކުއެކީގައި ހިންގި ކަމާއި، އިސްތިއުނާފުގެ ނުކުތާތައް ހަމަ އެއްގޮތްކަމާއި، 2014/HC-A/333 ގައި 1833/Cv-C/2011 ގެ ޙުކުމަށް ބަދަލު ގެންނަންޖެހޭ ސަބަބެއް ނެތްކަމަށް ކަނޑައެޅިފައިވާތީ، މި ޤަޟިއްޔާގެ ޙުކުމަށްވެސް ބަދަލު ގެންނަންޖެހޭ ސަބަބެއް ނެތެވެ.