: އައިމަން ޢަބްދުއްސައްތާރު ވ. ޕްރޮސިކިއުޓަރ ޖެނެރަލްގެ އޮފީސް

ކްރިމިނަލް ކޯޓުން، މުޖުތަމަޢުގެ ސަލާމަތާއި ރައްކާތެރިކަމަށްޓަކައި ކަމަށް ބަޔާންކޮށް، 12 ނޮވެންބަރު 2016 އިން 22 ނޮވެންބަރު 2016 އަށް ތުހުމަތުކުރެވޭ ފަރާތް ގޭގައި ބަންދުކޮށްފައި ބެހެއްޓުމަށް އަމުރުކުރި.

ފޯޖްކޮށްފައިވާ ލިޔުންތަކެއް އިމިގްރޭޝަން އޮންލައިން ސިސްޓަމަށް ހުށަހަޅައިގެން ބިދޭސީން ގެނައުމުގެ ތުހުމަތުގައި ފުލުހުން ބަންދުގެ މުއްދަތު އިތުރުކުރަން އެދުނު މައްސަލައެކެވެ.

އިސްތިއުނާފުކުރި ފަރާތުން ބުނީ ބަންދުގައި ބަހައްޓަންޖެހޭ ސަބަބު ފުލުހުން ބުނެދީފައި ނުވާކަމަށާއި، ޟަރޫރަތަށް ރިޢާޔަތްނުކޮށް ޤާނޫނުއަސާސީގެ 21 ވަނަ މާއްދާގެ ޙައްޤުތައް ޤާނޫނުއަސާސީގެ 16 ވަނަ މާއްދާއާ ޚިލާފަށް ހަނިކޮށްފައިވާ ކަމަށެވެ. ދައުލަތުން ބުނީ ފޯމުގައި ނެތް ނަމަވެސް މުޖުތަމަޢުގެ ސަލާމަތުގެ ސަބަބު ބަންދުގެ މަޖިލީހުގައި ފުލުހުން ފާހަގަކޮށްފައިވާނެ ކަމަށެވެ.

ޞައްޙަ ލިޔުމަށް ބަދަލުގެނައުމާއި މަކަރުވެރި ޢަމަލު (ފޯޖަރީ) ގެ ތުހުމަތުގައި ތުހުމަތުކުރެވޭ ފަރާތް ގޭގައި ބަންދުގައި ބެހެއްޓުމަށް ކްރިމިނަލް ކޯޓުން ނެރުނު އަމުރު، ޤާނޫނުއަސާސީގެ 49 ވަނަ މާއްދާއާއި ބަންދާބެހޭ ޤަވާޢިދުގެ 7 ވަނަ މާއްދާގެ (ހ) އާއި ސުޕްރީމް ކޯޓުގެ 2010/SC-A/19 ގެ އުޞޫލުތަކާ އެއްގޮތްތޯ.

އިސްތިއުނާފު ބާޠިލް، ކްރިމިނަލް ކޯޓުގެ ކޯޓު އަމުރު ޤާއިމް

ކުށުގެ ޒާތާއި ބާވަތާއި ކުޑަބޮޑު މިނާއި ތަޙުޤީޤުގެ ދަތިތަކަށް ބަލާއިރު ދޫކޮށްލުމަކީ މުޖުތަމަޢުގެ ސަލާމަތަށް ނުރައްކަލެއް މެދުވެރިވެދާނެ ކަމެއްކަމަށާއި، ތުހުމަތުކުރެވޭ މިންވަރުގެ ހެކި ދައުލަތުން ހުށަހަޅާފައިވާކަމަށް ކަނޑައަޅައި، ދައުލަތުން އިސްތިއުނާފުނުކުރާތީ ބަންދުގެ ތަން ބަދަލުކުރުމަށް އަމުރުކުރާނެ ތަނެއް ނެތްކަމަށް ބުނެ އަމުރު ޤާއިމުކުރި.