އަޙްމަދު ވިސާން ވ. : ޕްރޮސިކިއުޓަރ ޖެނެރަލްގެ އޮފީސް

ކްރިމިނަލް ކޯޓުން (762/Cr-C/2012) ފުލުހުންގެ ހެކިބަހާއި ޤަރީނާތަކުގެ މައްޗަށް ބިނާކޮށް ޑައިމޯފިން ޓްރެފިކްކުރުމުގެ ކުށް ސާބިތުވާތީ، 17/2011 ގެ 103 ވަނަ މާއްދާގެ (ނ) ގެ ދަށުން އުމުރަށް ޖަލަށްލުމާއެކު 100,000 ރުފިޔާގެ ޖޫރިމަނާއަށް ޙުކުމްކުރިއެވެ.

ކޯޓު އަމުރެއްގެ ދަށުން ގެއެއް ބަލާ ފާސްކުރަން ފުލުހުން ދިޔައިރު، އިސްތިއުނާފުކުރި ފަރާތް ސިޑިމަތީގައި ބިސްކޯދު ފޮއްޓެއް ހިފައިގެން ހުއްޓާ ފުލުހުން ފެނުމުން މައްޗަށް އަރާ އެ ފޮށި ވައްޓާލިއެވެ. ފޮށީގެ ތެރެއިން 6 ޖޫސްޕެޓީ ކޮތަޅުގައި ގާތްގަނޑަކަށް 490 ގްރާމް ޑައިމޯފިން ފެނުނެވެ.

އިސްތިއުނާފުކުރި ފަރާތުން ބުނީ، ހައްޔަރުކުރީ ޤާނޫނާ ޚިލާފަށް ކަމަށާއި، ހެކި ހޯދީ ޤާނޫނުއަސާސީގެ 52 ވަނަ މާއްދާއާ ޚިލާފަށް ކަމަށާއި، ސިޑީގެ ހަނިކަން، ޗެއިން އޮފް ކަސްޓަޑީ ފުރިހަމަނުވުން، ތަޙުލީލު ރިޕޯޓުގެ ޢަދަދުތަކުގެ ތަފާތު ފަދަ ކަންކަމުން ޝައްކު އުފެދޭ ކަމަށެވެ. ދައުލަތުން ބުނީ ޗެއިން އޮފް ކަސްޓަޑީ ކާޑު އެވިޑެންސާ އެކުގައި ހުންނަ ކަމަށެވެ.

ޑައިމޯފިން ޓްރެފިކްކުރުމުގެ ކުށުން ކުށްވެރިކުރި ޙުކުމެއްގައި، ހައްޔަރުކުރުމާއި ހެކި ހޯދުން ޤާނޫނާ ޚިލާފަށް ކަމަށާއި، (ސިޑީގެ ހަނިކަން، ޗެއިން އޮފް ކަސްޓަޑީ، ތަޙުލީލު ރިޕޯޓުގެ ޢަދަދުތަކުގެ ތަފާތު ފަދަ) ކަންކަމުން ކުށް ޤާނޫނުއަސާސީގެ 51 ވަނަ މާއްދާގެ (އ) ގެ މިންގަނޑަށް ސާބިތުނުވާ ކަމަށް ބުނާ ނުކުތާތަކުން ޙުކުމް ބާޠިލުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމުގައި ކުށްވެރިކުރި ބައި ޤާއިމް

ތުހުމަތުކުރެވޭ ފަރާތުގެ ޢަމަލުތަކުން ކުށެއް ކުރަން އުޅޭކަމުގެ އެކަށީގެންވާ ސަބަބު ހުރިކަމަށާއި، ޗެއިން އޮފް ކަސްޓަޑީ ފޯމުތަކުން ތަޙުލީލުކުރީ ފެނުނު ތަކެތިކަން އެނގޭކަމަށާއި، ޢަދަދުތަކުގެ ތަފާތަކީ ލިޔުމުގެ ކުށާއި ރައުންޑްކުރުމުގެ ތަފާތު ކަމަށާއި، ތަޙުލީލުކުރި ފަރާތާ ދަށުކޯޓުގައި ސުވާލު ނުކުރާކަމަށް ފާހަގަކޮށް، ފާހަގަކުރި ކަންކަމުން އެކަށީގެންވާ ޝައްކެއް ނުއުފެދޭތީ ކުށްވެރިކުރި ބައި ޤާއިމުކުރިއެވެ.