އަޙްމަދު ޝުޖާޢު ވ. ޤާސިމް އިބްރާހީމް

ސިވިލް ކޯޓު (ހުޅުމާލެ ޑިވިޜަން) އިން ބިމުގެ ވެރިފަރާތް އެއްބަސްވުމާ ޚިލާފުވެފައިވާކަމަށާއި، 12.6 މިލިއަން ރުފިޔާ ނަގައި ނުދެވޭނެ ނަމަވެސް އެއްބަސްވުމުގެ މާއްދާއާ އެއްގޮތަށް އުވާލި ތާރީޚުން މުއްދަތު ހަމަވާ ތާރީޚާ ހަމައަށް މާކެޓް ކުލި ހޯދުމުގެ ޙައްޤު ކުއްޔަށް ހިފި ފަރާތަށް ލިބިގެންވާކަމަށް ޙުކުމްކުރިއެވެ.

ބިމުގެ ވެރިފަރާތާއި ކުއްޔަށް ހިފި ފަރާތާ ދެމެދު، ކުއްޔަށް ހިފި ފަރާތުން ބިމުގައި ފައުންޑޭޝަނާއި ތިރީބުރި ޢިމާރާތްކޮށް 200,000 ރުފިޔާ ދީގެން ތިރީބުރި 35 އަހަރަށް ބޭނުންކުރުމަށް އެއްބަސްވެފައިވެއެވެ. ބިމުގެ ވެރިފަރާތުން އެއްބަސްވުން ބާޠިލުކޮށް ތަނުގައި ތަޅުއަޅައި ބިން އެހެން ފަރާތަކަށް ވިއްކާލިއެވެ.

އިސްތިއުނާފުކުރި ފަރާތުން ބުނީ ހެއްކާބެހޭ ޤާނޫނާއި ސުޕްރީމް ކޯޓުގެ ޤަޟިއްޔާތަކާ ޚިލާފަށް ވިޝުއަލް އިންސްޕެކްޝަން ރިޕޯޓަށް ރިޢާޔަތްނުކުރިކަމަށާއި، ޤާނޫނުއަސާސީން ލިބިދޭ މުދަލުގެ ޙައްޤަށް ރިޢާޔަތްނުކުރިކަމަށެވެ.

ބިމުގެ ވެރިފަރާތާއި އެބިމުގައި ޢިމާރާތްކޮށް ތިރީބުރި 35 އަހަރަށް ކުއްޔަށް ހިފި ފަރާތާ ދެމެދު ވެފައިވާ އެއްބަސްވުން ބިމުގެ ވެރިފަރާތުން މުއްދަތު ހަމަވުމުގެ ކުރިން ބާޠިލުކޮށް ބިން ވިއްކާލުމަކީ އެއްބަސްވުމާ ޚިލާފުވުމެއްތޯއާއި، އެއްބަސްވުމުގައި ކަނޑައެޅިފައިވާ ގެއްލުމުގެ ބަދަލު ދޭން ޖެހޭތޯއާއި، ޢިމާރާތުގެ ފެންވަރާބެހޭ "ވިޝުއަލް އިންސްޕެކްޝަން ރިޕޯޓަށް" ދަށުކޯޓުން ރިޢާޔަތްނުކުރުން ރަނގަޅުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އެއްބަސްވުމާ ޚިލާފުވީ ބިމުގެ ވެރިފަރާތް ކަމާއި، ރިޕޯޓުގެ ޞައްޙަކަން ސާބިތުނުކުރާތީ އެއަށް ރިޢާޔަތްނުކުރުން ރަނގަޅުކަމާއި، އެއްބަސްވުމުގައި ކަނޑައެޅިފައިވާ ގެއްލުމުގެ ބަދަލު ކޮންޓްރެކްޓާބެހޭ ޤާނޫނުގެ ދަށުން ދޭން ޖެހޭކަމާއި، ދުސްތޫރީ ނުކުތާއަށް އިސްވެ ރިޢާޔަތްކުރެވިފައިވާތީ ދަށުކޯޓުގެ ޙުކުމް ބަދަލުކުރަން ސަބަބެއް ނެތެވެ.