އަޙްމަދު ޙައްމާދު ވ. ޕްރޮސިކިއުޓަރ ޖެނެރަލް

ހއ. ފިއްލަދޫ މެޖިސްޓްރޭޓް ކޯޓުން ދަޢުވާ އެކަށީގެންވާ ޝައްކެއްނެތި ސާބިތުވާކަމަށް ކަނޑައަޅައި 10 އަހަރު ޖަލަށްލުމަށް ޙުކުމްކުރިއެވެ.

ކުޑަކުއްޖަކު ހޮޅުއަށީގައި އިންދާ އަދި ސައިކަލުގައި މުލީކޮޅަށް ގެންގޮސް ކުއްޖާގެ ކުރިމަތި ފަރާތުގައި ހިފިކަމަށް ބުނެ އިސްތިއުނާފުކުރި ފަރާތުގެ މައްޗަށް ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ދަޢުވާ އުފުލިއެވެ.

އިސްތިއުނާފުކުރި ފަރާތުން ބުނީ މުއްދަތު މަޖިލީހުގެ ބަޔާނަކީ އިޢުތިރާފެއް ނޫންކަމަށާއި، ވަކީލުގެ ޙައްޤު ނުލިބުނުކަމަށާއި، ހެކިބަހުގައި ފުށުއެރުން ހުރިކަމަށާއި، ހެކިވެރިންގެ ސިޔާސީ ދެކޮޅުވެރިކަމަށް ރިޢާޔަތް ނުކުރެވުނުކަމަށެވެ. ދައުލަތުން ބުނީ އިޢުތިރާފު ޞަރީޙަކަމަށާއި ސުޕްރީމް ކޯޓުގެ މިންގަނޑުތަކާ އެއްގޮތަށް ހެކި ވަޒަންކުރެވިފައިވާކަމަށެވެ.

ބަންދާމެދު ގޮތެއް ނިންމާ (މުއްދަތު) މަޖިލީހުގައި ތުހުމަތުކުރެވޭ ފަރާތް ދިން އިޢުތިރާފު ބަޔާން، އޯޑިއޯ ރެކޯޑެއް ނެތި އަދި ވަކީލެއް ނެތި ނެގިނަމަވެސް ހެއްކެއްގެ ގޮތުގައި ބަލައިގަނެވޭނެތޯއާއި، ތަޙްޤީޤުގައި ވަކީލުގެ ޙައްޤު ލިބިދީފައިވޭތޯއާއި، ކުޑަކުއްޖާގެ ހެކިބަސް ވަޒަންކުރުމުގައި ފުށުއެރުންތަކާއި ކުއްޖާގެ އަޚްލާޤާއި ނުނިޔަތާއި ހެކިވެރިންގެ ސިޔާސީ ދެކޮޅުވެރިކަމަށް ރިޢާޔަތްކުރެވިފައިވާ ގޮތް ރަނގަޅުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

މުއްދަތު މަޖިލީހުގެ އިޢުތިރާފަކީ އެހެން ހެކިތަކުން ކޮރޮބޮރޭޓްވާ ޤަރީނާއެއް ކަމާއި، ވަކީލުގެ ޙައްޤު އަންގާފައިވާކަމާއި، ކުއްޖާގެ ހެކިބަސް އެތެރެފުށުން އަދި ބޭރުފުށުން އެއްގޮތްކަމާއި، ފުށުއެރުންތަކަކީ ޖައުހަރީ ފުށުއެރުންތަކެއް ނޫންކަމާއި، ނުނިޔަތާއި ހަސަދަ ސާބިތުކުރެވިފައި ނުވާތީ ދަށުކޯޓުގެ ޙުކުމަށް ބަދަލު ނުގެނެވެއެވެ.