ޢަބްދުﷲ ސަޢީދު ވ. އިބްރާހީމް ސަޢީދު

ފޭދޫއާއި ހިތަދޫއަކީ އިދާރީ ގޮތުން ވަކި ދެ ރަށް ކަމުން، ކޯޓުތަކުގެ ޤާނޫނުގެ 69(ށ) ގެ ދަށުން މުދާ ހުރި ދާއިރާގެ ކޯޓަކަށް ވާންޖެހޭތީ، ލާޖެއްސުމުގެ މައްސަލަ ކުރިއަށް ގެންދެވޭނެ ތަނެއް ނެތްކަމަށް ފޭދޫ މެޖިސްޓްރޭޓް ކޯޓުން ނިންމިއެވެ.

އައްޑޫ ސިޓީގެ ފޭދޫގައިވާ ބަންޑާރަ ގޯއްޗަކާއި ހިތަދޫގައިވާ އަމިއްލަ ގޯތީގެ 700 އަކަފޫޓު ބިމެއް، އޭގައިވާ ޢިމާރާތާއި ނުއުފުލޭ މުދަލާއެކު، އަގުކުރުމެއްނެތި ލާޖެއްސުމަށް އެދި ފޭދޫ މެޖިސްޓްރޭޓް ކޯޓަށް މައްސަލަ ހުށަހެޅި، އަނެއް ފަރާތުން އެކަމަށް ރުހުން ދިނެވެ.

ބިން ހުރީ ފޭދޫގައި ކަމުން އެ ކޯޓަށް އިޚްތިޞާޞް ލިބޭކަމަށާއި، ހަމަ އެ ކޯޓުން ކުރިން ފޭދޫ އާއި މަރަދޫގެ ގޯތި ލާޖައްސާފައިވާކަމަށާއި، ޤާނޫނުއަސާސީގެ 19 އާއި 40 ވަނަ މާއްދާއާ ޚިލާފުކަމަށާއި، 2013/HC-A/106 ޤަޟިއްޔާގެ ޚިލާފަށް ދަރިންގެ އިޢުތިރާޟް ބަލާފައިވާކަމަށް އިސްތިއުނާފުކުރި ފަރާތުން ބުނެފައިވެއެވެ.

އައްޑޫ ސިޓީގެ ފޭދޫގެ ބިމަކާއި ހިތަދޫގެ ބިމެއް ލާޖެއްސުމުގެ މައްސަލަ ބެލުމުގެ ސަރަޙައްދީ އިޚްތިޞާޞް ފޭދޫ މެޖިސްޓްރޭޓް ކޯޓަށް ލިބިގެންވޭތޯ؛ އަދި ލާޖެއްސުމުގެ މުޢާމަލާތުގައި ޝަރީޢަތުން ބަލަންޖެހޭ އިޢުތިރާޟްތައް ކޮބައިތޯ.

ދަށުކޯޓުގެ ޙުކުމް ބާޠިލު، އަލުން ބެލުމަށް ފޮނުވި

15/2010 ޤަރާރުން އައްޑޫއަކީ މީހުން ދިރިއުޅޭ އެއްރަށެއްގެ ގޮތުގައި ކަނޑައެޅިފައިވާތީ، 2016/HC-S-A/22 ޤަޟިއްޔާއަށް ތަބާވެ، ފޭދޫ މެޖިސްޓްރޭޓް ކޯޓަށް އިޚްތިޞާޞް ލިބޭކަމަށް ކަނޑައަޅައި، 2013/HC-A/106 ގައިވާ އުޞޫލުތަކާ އެއްގޮތަށް ބިމުގެ ރަޖިސްޓަރީ ބަލަހައްޓާ އިދާރާގެ އިޢުތިރާޟް ސާފުކޮށް އަލުން ބެލުމަށް ފޮނުވިއެވެ.