ޢާމިރު ޔޫސުފް ވ. ޙަސަން ޢަލީދީދީ

ސިވިލް ކޯޓުން ބޭންކުގެ އެސެސްމަންޓުން އިމާރާތުގެ އަގު 2,100,000 ރުފިޔާ ކަމަށް ބަލައި، ކުލިން ލިބުނު 762,000 ރުފިޔާ އުނިކޮށް 1,338,000 ރުފިޔާ ބިމުގެ ވެރިފަރާތުން ދައްކަން ޙުކުމްކުރިއެވެ.

ބިމުގެ ވެރިފަރާތާ އެއްބަސްވެގެން، 15 އަހަރަށް 2 ފްލޯރ ކުއްޔަށް ލިބޭ ގޮތަށް އިސްތިއުނާފު ރައްދުވި ފަރާތުގެ ޚަރަދުގައި 6 ބުރީގެ އިމާރާތެއް ބިނާކުރިއިރު، ބިމުގެ ވެރިފަރާތުން ފްލޯރތައް ވަކިކޮށް ކުއްޔަށް ދިނުމަށް އިންކާރުކުރުމުން ޚަރަދު ހޯދުމަށް ދަޢުވާކުރިއެވެ.

ބިމުގެ ވެރިފަރާތުން ބުނީ މައްސަލައިގެ ޙަޤީޤަތްތަކާއި ހެކިތައް ރަނގަޅަށް ވަޒަންނުކުރި ކަމަށާއި، ބޭންކް ލޯނުން އިމާރާތްކުރިކަމަށް ރިޢާޔަތްނުކުރި ކަމަށާއި، ޢާއިލާގެ މީހެއްގެ ހެކިބަސް ބަލައިގަތުމަކީ ހެއްކާބެހޭ އުޞޫލުތަކާ ޚިލާފު ކަމަށެވެ.

ގޯއްޗެއްގައި އިމާރާތް ކުރީ ބިމުގެ ވެރިފަރާތާ އެއްބަސްވެގެން، ކުއްޔަށް ހިފި ފަރާތުގެ ޚަރަދުގައި ކަމަށާއި، ބިމުގެ ވެރިފަރާތް ކުއްޔަށް ދިނުމަށް އިންކާރުކުރާތީ ޚަރަދު އަނބުރާ ދޭންޖެހޭ ކަމަށް ސިވިލް ކޯޓުން ކަނޑައެޅުމުގައި ހެކި ވަޒަންކުރި ގޮތާއި، ދަޢުވާކުރި ފަރާތާ ތިމާގެކަމުގެ ގުޅުން ހުރި ހެކިވެރިއެއްގެ ހެކިބަސް ބަލައިގަތުން ޞައްޙަތޯ.

އިސްތިއުނާފު ބާޠިލު، ދަށުކޯޓުގެ ޙުކުމް ޤާއިމް

ބޭންކް ލޯނު ނެގުމުގެ ކުރިން 4 ބުރީގެ އިމާރާތް ހުރިކަމާއި ލޯނަކީ ނުނިމިހުރި މަސައްކަތް ނިންމުމަށް ނެގި ލޯނެއްކަން ލިޔުންތަކުން އެނގޭތީ، އަދި ތިމާގެކަމުގެ ގުޅުމަކީ އެކަނި ހެކިބަސް ރައްދުކުރާ ސަބަބެއް ނޫންތީ، ދަށުކޯޓުން ހެކި ވަޒަންކުރުމުގައި ގޯހެއް ނުހަދައެވެ.