މުޙުތާޒް މުޙުސިން ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ކުށް ސާބިތުވާކަމަށް ކަނޑައަޅައި ޓެރަރިޒަމް މަނާކުރުމުގެ ޤާނޫނުގެ 6 ވަނަ މާއްދާގެ (ނ) ގެ ދަށުން 17 އަހަރު ޖަލަށް ލުމަށް ޙުކުމްކުރިއެވެ.

ރައީސުލްޖުމްހޫރިއްޔާ ހައްޔަރުކުރުމަށް ނެރެފައިވާ އަމުރެއްކަމަށް ދައްކުވައިދޭ ޞައްޙަނޫން ކޯޓު އަމުރެއް އދ. މާމިގިލި މެޖިސްޓްރޭޓް ކޯޓުގައި ތައްޔާރުކޮށް، ސިޓީއުރައެއްގައި ބައިވާ ފުލުހުންނަށް ނަގުއްވާ ހައްޔަރުކުރަން އުޅުނުކަމަށް ބުނެ ޓެރަރިޒަމްގެ ޢަމަލެއް ކުރަން އުޅުމާއި ބައިވެރިވުމުގެ ދަޢުވާ ކުރެވުނެވެ.

އިސްތިއުނާފުކުރި ފަރާތުން ބުނީ ގަދަކަމުން ފޮރުވުން ނުވަތަ ރަހީނުކުރުން ސާބިތުވާ ހެއްކެއް ނެތްކަމާއި، 51 (އ) ގެ މިންގަނޑަށް ކުށް ސާބިތުނުވާކަމާއި، ދިފާޢީ ހެކިވެރިއެއް ޙާޟިރުނުކުރިކަމާއި، ޢަދުލުވެރިނޫން ހެކިންގެ ހެކިބަސް ބަލައިގަތްކަމާއި، 3 ދަޢުވާ އެއް އަޑުއެހުމެއްގައި ބެލުމުން ދިފާޢުވުމުގެ ފުރުޞަތު ނުލިބުނުކަމެވެ.

ޓެރަރިޒަމް މަނާކުރުމުގެ ޤާނޫނުގެ 6 ވަނަ މާއްދާގެ (ހ) އާ ޙަވާލާދީ ޓެރަރިޒަމްގެ ޢަމަލެއް ކުރަން އުޅުމާއި ބައިވެރިވުމުގެ ކުށުގެ ނިޔަތުގެ ރުކުނާއި ޢަމަލުގެ ރުކުން ޤާނޫނުއަސާސީގެ 51 ވަނަ މާއްދާގެ (އ) ގެ މިންގަނޑަށް ސާބިތުވިތޯއާއި، ދިފާޢީ ހެކިވެރިއެއް ޙާޟިރުނުކޮށް، ސަބަބު ބަޔާންނުކޮށް ސިއްރު ހެކި ބަލައިގަނެ، އެއް އަޑުއެހުމެއްގައި ގިނަ ދަޢުވާތަކެއް ބެލުމުން އިންސާފުން ޝަރީޢަތްކުރުމުގެ ޙައްޤު ގެއްލުނުތޯ.

ދަށުކޯޓުގެ ޙުކުމް ބާޠިލު

ޓެރަރިޒަމްގެ ނިޔަތުގެ ރުކުނާއި ޢަމަލުގެ ރުކުން، ބައިވެރިވި ސިފައާއި ކުރަން އުޅުމުގެ އުންސުރުތައް ދައުލަތުން ސާބިތުކޮށްދީފައި ނުވާތީއާއި، ދަޢުވާގެ ވާޤިޢާތަކަކީ ގަދަކަމުން ފޮރުވުމެއް ނުވަތަ ރަހީނުކުރުމެއް ނޫންތީއާއި، ދިފާޢީ ހެކިވެރިޔާ ޙާޟިރުނުކޮށް ސިއްރު ހެކި ބަލައިގަތް ސަބަބު ބަޔާންނުކުރުމުން އިންސާފުން ޝަރީޢަތްކުރުމުގެ ޙައްޤުތައް ގެއްލިފައިވާތީ ޙުކުމް ބާޠިލުކުރެވުނެވެ.