2015/HC-A-02/03

ވަޒީފާއާބެހޭ ޓްރައިބިއުނަލުން ނިންމީ، ވަކިކުރި ސަބަބު ސާބިތުކޮށްދެވިފައި ނުވާތީ ވަކިކޮށްފައިވަނީ ވަޒީފާއާބެހޭ ޤާނޫނާ ޚިލާފަށް ކަމަށާއި، މުވައްޒަފު ކުރިން އަދާކުރި ވަޒީފާގައި އަލުން ބަހައްޓައި ވަކިކުރި ތާރީޚުން ފެށިގެން މުސާރައާއި އިނާޔަތްތައް ދޭން. ހައިކޯޓުގެ 2012/HC-A/182 ގެ ޙުކުމް ސުޕްރީމް ކޯޓުން ބާޠިލުކޮށް މައްސަލަ ހައިކޯޓަށް އަލުން ބެލުމަށް ފޮނުވިއެވެ.

ރިޒޯޓެއްގެ ވޯޓަރ ވިލާތަކާއި ޑިލަކްސް ވިލާތައް މަރާމާތުކުރުމަށް ފަސް މަސް ދުވަހަށް ބަންދުކުރުމާ ގުޅިގެން އޮކިއުޕެންސީ ދަށްވާނެކަމަށް ލަފާކޮށް، މުވައްޒަފެއްގެ މަޤާމު ރިޑަންޑަންޓްވިކަމަށް ބުނެ، ނޯޓިސްގެ ބަދަލުގައި ފައިސާއާއި ރިޑަންޑަންސީ ޕޭމަންޓެއް ދީގެން 2011 ގައި ވަޒީފާއިން ވަކިކުރެވުނެވެ.

ކުންފުނިން ބުނީ ޓްރައިބިއުނަލުން ކުންފުނީގެ ވާހަކަތަކަށް ރިޢާޔަތްނުކުރި ކަމަށާއި، ފުރިހަމަކުރަންޖެހޭ 'ޑިއު ޕްރޮސެސް' ޤާނޫނެއްގައި ބަޔާންކޮށްފައި ނެތްކަމަށާއި، އޮނިގަޑުން އުނިކުރި މަޤާމު އަނބުރާ ދިނުމަށް އަމުރުކުރުމަކީ ޓްރައިބިއުނަލުގެ ކުރީގެ ނިންމުންތަކާ ޚިލާފު ކަމެއް ކަމަށެވެ.

ރިޑަންޑަންސީގެ ޙާލަތު މެދުވެރިވިކަމަށް ބުނެ މުވައްޒަފަކު ވަޒީފާއިން ވަކިކުރުމުގައި ވަޒީފާދޭ ފަރާތުން މައުޟޫޢީ ޢަދުލުވެރިކަމާއި އިޖްރާއީ ޢަދުލުވެރިކަން ޤާއިމުކޮށްފައިވޭތޯ، އަދި ވަޒީފާއާބެހޭ ޓްރައިބިއުނަލުން މުވައްޒަފު ވަޒީފާއަށް އަނބުރާ ބެހެއްޓުމަށް ނިންމި ނިންމުމަށް ބަދަލު ގެންނަންޖެހޭތޯ (ސުޕްރީމް ކޯޓުން އަލުން ބެލުމަށް ފޮނުވުމާ ގުޅިގެން).

އިސްތިއުނާފު ބާޠިލް، ވަޒީފާއާބެހޭ ޓްރައިބިއުނަލްގެ ނިންމުން ޤާއިމް

ރިޑަންޑަންސީއަކީ އެކަށީގެންވާ ސަބަބަކަށް ވެދާނެ ނަމަވެސް، ރިޒޯޓުގެ ބައެއް ވަގުތީގޮތުން މަރާމާތަށް ބަންދުކުރުމަކީ ވިޔަފާރީގެ ޢާންމު ޙާލަތެއްކަމުން އެއީ ރިޑަންޑަންސީ އިޢުލާނުކުރެވޭނެ ޙާލަތެއް ނޫނެވެ. ރިޑަންޑަންސީގެ ނޯޓިސް ވަކިކުރި ދުވަހުގެ ކުރީ ދުވަހު ނެރުމާއި، ވަކިކުރާ މުވައްޒަފުން ހޮވާ އުޞޫލާއި ޢިނާޔަތުގެ މިންގަނޑުތައް ކުރިއާލާ ނޭންގުމުން މައުޟޫޢީ އަދި އިޖްރާއީ ޢަދުލުވެރިކަން ޤާއިމުކޮށްފައެއް ނުވެއެވެ.