ވިލާ އެޑިއުކޭޝަނަލް ސަރވިސަސް ޕްރައިވެޓް ލިމިޓެޑް ވ. އަޙްމަދު ރަޝީދު

ވަޒީފާއާބެހޭ ޓްރައިބިއުނަލުން ވަކިކުރީ ޤާނޫނާ ޚިލާފަށްކަމަށް ކަނޑައަޅައި، ވަޒީފާއަށް ރުޖޫޢަކުރުމުގެ އަމުރެއް ނުނެރެ، 12 މަހުގެ މުސާރައާއި ޢިނާޔަތާ އެއްވަރުގެ 212,634 ރުފިޔާ ބަދަލުގެ ގޮތުގައި ނަގައިދިނުމަށް ނިންމިއެވެ.

ސްކޫލެއްގެ އިސްލާމިކް ކޯޑިނޭޓަރުގެ މަޤާމުގައި 8 އަހަރަށްވުރެ ގިނަ ދުވަސް ވަޒީފާ އަދާކުރި މުވައްޒަފަކު ނަޞޭޙަތެއް ނުދީ ސަބަބެއް ނުއަންގާ ވަޒީފާއިން ވަކިކުރިއެވެ.

ވަޒީފާދޭ ފަރާތުން ބުނީ 1 އަހަރުގެ ބަދަލަކީ 2019/SC-A/27 އާއި 2019/SC-A/36 ގައިވާ ހަމަތަކާ ޚިލާފު، ނުޙައްޤު މުއްސަނދިކަމެއް ލިބޭ އަދަބެއްގެ ގޮތުގައި ދިން ބަދަލެއްކަމަށެވެ. މުވައްޒަފުން ބުނީ ބަދަލު މަޙްދޫދުކުރެވިފައި ނުވާތީ 1 އަހަރަކީ އެކަށީގެންވާ ޢަދުލުވެރި މިންވަރެއްކަމަށެވެ.

ޤާނޫނާ ޚިލާފަށް ވަޒީފާއިން ވަކިކުރެވުނު މުވައްޒަފަކަށް 1 އަހަރުގެ މުސާރައާއި ޢިނާޔަތާ އެއްވަރުގެ ބަދަލު ނަގައިދިނުމަކީ ވަޒީފާއާބެހޭ ޤާނޫނުގެ ބަދަލާބެހޭ މާއްދާގެ (ރ) ގެ ދަށުން އެކަށީގެންވާ ޢަދުލުވެރި ބަދަލެއްތޯ؛ އަދި ބަދަލުގެ މިންވަރު ކަނޑައަޅަންވީ ކޮން ހަމަތަކެއްގެ މައްޗަށްތޯ.

ބައެއް ބަދަލުކުރި (ބަދަލު 12 މަހުން 9 މަހަށް ކުޑަކުރި)

2019/SC-A/27 ގެ ހަމަތައް ތަޠްބީޤުކޮށް، މުވައްޒަފުގެ ޚިދުމަތުގެ މުއްދަތާއި، ޢުމުރާއި، ނޯޓިސް މުއްދަތުގެ މުސާރަ ދީފައިވުމާއި، އެހެން ވަޒީފާއެއް ހޯދުމުގެ ފުރުޞަތާއި، ނުޙައްޤު މުއްސަނދިކަމެއް ނުލިބޭނެ ގޮތަށް ބަދަލު ދިނުމުގެ އުޞޫލަށް ބަލައި 9 މަހުގެ މުސާރައާއި ޢިނާޔަތާ އެއްވަރުގެ ބަދަލު ޢަދުލުވެރިކަމަށް ކަނޑައެޅުނެވެ.