ޢާއިޝަތު ޢާޠިޔާ ނަޞީރު ވ. ސިވިލް ސަރވިސް ކޮމިޝަން

ސިވިލް ސަރވިސް ކޮމިޝަނުން ޝަކުލީ އަދި އިޖުރާއީ ގޮތުން ތަބާވާންޖެހޭ ކަންކަމަށް ތަބާވެފައިވާތީ ވަޒީފާ އަނބުރާ ދިނުމަށާއި މުސާރަ ދިނުމަށް އަންގާނެ ތަނެއް ނެތްކަމަށް ސިވިލް ކޯޓުން ޙުކުމްކުރިއެވެ.

އަމީނިއްޔާ ސްކޫލްގެ ޕްރިންސިޕަލް، ސްކޫލުން ހިންގި ފަންޑް ރެއިޒިންގ ޙަރަކާތްތަކާއި ފޭސްބުކް ޕޯސްޓްތަކާއި ޕީ.ޓީ.އޭއަށް ދިން މަޢުލޫމާތުގެ ސަބަބުން ސަރުކާރު ބަދުނާމުވާކަމަށް ބުނެ، ތަޢުލީމީ ވުޒާރާގެ ސިޓީއަކަށް ބިނާކޮށް، ސިވިލް ސަރވިސް ކޮމިޝަނުން ނޯޓިސް ނުދީ 13 އެޕްރީލް 2015 ގައި ގަވާއިދުގެ 273 (ށ) ގެ ދަށުން ވަޒީފާއިން ވަކިކުރިއެވެ.

ޤާނޫނާ އެއްގޮތަށް އަމަލު ނުކޮށް ވަކިކުރިކަމަށާއި، 273 (ށ) ގެ ޙާލަތު އުފެދިފައި ނުވާކަމަށާއި، އިޞްލާޙީ ފިޔަވަޅު ޤާނޫނާ ޚިލާފުކަމަށާއި، އެދުނު ހެކިން ނުގެނެސް ޢަދުލުވެރި ޝަރީޢަތުގެ ޙައްޤު ގެއްލުނުކަމަށް އިސްތިއުނާފުކުރި ފަރާތުން ބުންޏެވެ. ކޮމިޝަނުން ބުނީ ވުޒާރާގެ ސިޓީތަކުން 273 (ށ) ގެ ޙާލަތު މެދުވެރިވިކަން ސާބިތުވާކަމަށެވެ.

ސިވިލް ސަރވިސްގެ ގަވާއިދު 2014 ގެ 273 ވަނަ މާއްދާގެ (ށ) ގެ ދަށުން ނޯޓިސް ނުދީ ސްކޫލެއްގެ ޕްރިންސިޕަލް ވަޒީފާއިން ވަކިކުރީ އެކަށީގެންވާ ސަބަބަކާއި ޤާނޫނާ އެއްގޮތަށްތޯއާއި، ނޫންނަމަ ދެވޭނެ ޤާނޫނީ ފަރުވާއަކީ ވަޒީފާއަށް އަނބުރާ ރުޖޫޢަކުރުންތޯ ނުވަތަ ބަދަލު ނަގައިދިނުންތޯ.

ދަށުކޯޓުގެ ނިންމުން ބާޠިލު، 6 މަހުގެ މުސާރައާއި ޢިނާޔަތް (155,850 ރުފިޔާ) ބަދަލުގެ ގޮތުގައި ނަގައިދިނުމަށް ޙުކުމްކުރި

ވަކިކުރި މައިގަނޑު ސަބަބު ސާބިތުވާވަރުގެ ހެއްކެއް ކޮމިޝަނުން ހުށަނާޅައި، ހަމައެކަނި ވުޒާރާގެ ސިޓީއަށް ބިނާކޮށް ވަކިކުރީތީ މައުޟޫޢީ އަދި އިޖުރާއީ ޢަދުލުވެރިކަން ޤާއިމް ނުވެއެވެ. ޕްރިންސިޕަލްގެ މަޤާމުގައި އިތުބާރު މުހިއްމުވާތީ ވަޒީފާއަށް ރުޖޫޢަކުރުން މަޞްލަޙަތު ނުވާތީ، 6 މަހުގެ މުސާރައާއި ޢިނާޔަތް ޢަދުލުވެރި ބަދަލެއްގެ ގޮތުގައި ކަނޑައެޅިއެވެ.