ޢުމަރު ޒާހިރު ޢަބްދުއްޞަމަދު ވ. މުޙައްމަދު ރިޟްވާން

ސިވިލް ކޯޓުން 2016 ނޮވެންބަރު އަދި ޑިސެންބަރު މަހުގެ ކުލީގެ ގޮތުގައި 50,000 ރުފިޔާ 15 ދުވަހުގެ ތެރޭގައި ދައްކަން ޙުކުމްކުރިއެވެ.

އަނގަބަހުން ވެވުނު 5 އަހަރުގެ ކުލީގެ އެއްބަސްވުމެއްގެ ދަށުން ޢިމާރާތެއްގެ 4 ފަންގިފިލާ ކުއްޔަށް ހިފި ފަރާތް، މުއްދަތު 2016 ޖުލައިގައި ހަމަވިފަހުންވެސް 2016 ޑިސެންބަރާ ހަމައަށް ތަން ބޭނުންކުރިއެވެ. ނޮވެންބަރު އަދި ޑިސެންބަރު މަހުގެ ކުލިއާއި ގެއްލުމުގެ ބަދަލު ހޯދުމަށް ދަޢުވާކުރެވުނެވެ.

އިސްތިއުނާފުކުރި ފަރާތުން ބުނީ ނޮވެންބަރު މަހުގެ ކުލި ދައްކާފައިވާކަމަށާއި ޑިސެންބަރު މަހުގެ ކުލި ބޭނުމެއް ނޫންކަމަށް ތަނުގެ ވެރިފަރާތުން ބުނިކަމަށް ހެކިވެރިއަކު ބުނާއިރު، ހުވާކުރަން ތައްޔާރަށް ހުއްޓަސް އެކަމަށް ނުބަލައި ޙުކުމްކުރުމަކީ ޤާނޫނުއަސާސީގެ 42(ށ) އާއި 142 އާ ޚިލާފުކަމަށެވެ.

އަނގަބަހުން ވެވުނު ކުލީގެ އެއްބަސްވުމުގެ މުއްދަތު ހަމަވުމަށްފަހު ކުއްޔަށް ހިފި ފަރާތް ތަން ބޭނުންކުރި ދެމަހުގެ ކުލި ދައްކަން ސިވިލް ކޯޓުން ކުރި ޙުކުމަކީ، ކުލި ދެއްކިކަމަށް ނުވަތަ މާފުކުރިކަމަށް ހުވާކުރަން ތައްޔާރަށް ހުރި ފަރާތުގެ ދިފާޢަށް ނުބަލައި، ޝަރީޢަތުގެ އިޖުރާއަތު ފުރިހަމަނުކޮށް ކުރި ޙުކުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ތަން އިސްތިއުނާފުކުރި ފަރާތުގެ ބެލުމުގެ ދަށުގައި ހުރިކަން ސާބިތުވާތީ ކުލި ދެއްކިކަން ނުވަތަ މާފުކުރިކަން ސާބިތުކުރުމުގެ ބުރަ އޮތީ އޭނާގެ މައްޗަށް ކަމަށާއި، ހެކިންގެ ބަހުން ކުލި މާފުކުރިކަން ސާބިތުނުވާކަމަށާއި، ދިފާޢީ ދަޢުވާކުރާ ފަރާތަށް ހުވާ ލާޒިމުކުރެވޭނެ ޙާލަތެއް ނެތްކަމަށް ކަނޑައެޅިއެވެ.