ތަލްޢަތު މުޙައްމަދު ޢަލީ ވ. ޞަފިއްޔާ މުޙައްމަދު މަނިކު

ފެމިލީ ކޯޓުން ކުދިންގެ ޚަރަދަށް މަހަކު 4000/3000/2000 ރުފިޔާ ދައްކަން ކަނޑައަޅައި، މީގެ އިތުރުން އެންމެ ހަގު ކުއްޖާގެ 18 އަހަރު ފުރެންދެން ދިރިއުޅޭ ތަނުގެ ކުލީގެ ގޮތުގައި މަހަކު 12000 ރުފިޔާ ދައްކަން ކަނޑައަޅައި، ކިޔެވުމާއި އަންނައުނާއި ބޭސްފަރުވާއަށް ޚަރަދުކުރަން ބައްޕައަށް އެންގިއެވެ.

ވަރިވުމަށްފަހު ތިން ކުދިން ދިރިއުޅެމުންދަނީ މަންމައާއެކުއެވެ. ކުދިންގެ ޚަރަދާއި ކުދިންނާއެކު ދިރިއުޅޭނެ ތަނެއް ބައްޕަ ހަމަޖައްސައިދިނުމަށް މަންމަ ފެމިލީ ކޯޓަށް ދަޢުވާކުރިއެވެ. ބައްޕަ ކުރިން މާލޭގައި މަހަކު 22,000 ރުފިޔާގެ ކުއްޔަށް ފްލެޓެއް ނަގައިދީފައިވިއެވެ.

ބައްޕަ ބުނީ ރަށުގައި ސްކޫލް ނެތްކަމާބެހޭ މަޢުލޫމާތު ނުހޯދާ، އޭނާގެ މާލީ ޙާލަތަށް ނުބަލައި، ޢާއިލާއާބެހޭ ޤާނޫނުގެ 38 ވަނަ މާއްދާ ގޯސްކޮށް މާނަކޮށްގެން 12000 ރުފިޔާގެ ކުލި ކަނޑައެޅި ކަމަށެވެ.

ދަރިންގެ ޚަރަދުގެ ތެރޭގައި، ކުދިންނާއެކު މަންމަ ދިރިއުޅޭ ތަނުގެ ކުލީގެ ގޮތުގައި ކޮންމެ މަހަކު 12000 ރުފިޔާ ބައްޕަ ދައްކަން ފެމިލީ ކޯޓުން ކަނޑައެޅުމަކީ ބައްޕަގެ މާލީ ޙާލަތަށް ރިޢާޔަތްނުކޮށް ޢާއިލާއާބެހޭ ޤާނޫނުގެ 38 ވަނަ މާއްދާއާ ޚިލާފަށް ކުރި ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަރިން ދިރިއުޅޭނެ ތަނެއް ހަމަޖައްސައިދިނުމަކީ ބައްޕަގެ ޒިންމާއެވެ. ކުރިން 22,000 ރުފިޔާ ދައްކަމުން އައިއިރު މިހާރު ނުކުރެވޭނެ ސަބަބެއް ބުނެދީފައި ނުވާތީ، މާލޭގެ ކުލިތަކަށް ބަލާއިރު 12000 ރުފިޔާއަކީ އެކަށީގެންވާ ޢަދަދެކެވެ.