ޢަލީ ޒުހައިރު ވ. ޒާހިރާ ސުލައިމާން

ފެމިލީ ކޯޓުގެ ޙުކުމް ތަންފީޛުކުރާ ޑިވިޜަނުން، 2 މަހުގެ ތެރޭގައި ކުދިން ދިރިއުޅޭނެ ތަނެއް ބައްޕަގެ މާލޭގެ ގެއިން ދައްކަން އަންގައި ޙުކުމްކުރި.

ވަރިވި ދެމަފިރިންގެ ތިން ކުދިންގެ ޙަޟާނަތު މަންމައަށް ލިބި، ބައްޕަގެ ގެއިން ނުވަތަ ކުއްޔަށް ކުދިން ދިރިއުޅޭނެ ތަނެއް ދައްކަން 2014 ގައި ޙުކުމްކުރެވުނު؛ ބައްޕަ ހުޅުމާލެ ފްލެޓެއްގެ 1 ކޮޓަރި ކުއްޔަށް ހިފި ނަމަވެސް މަންމަ ބުނީ އެއީ އެކަށީގެންވާ ތަނެއް ނޫންކަމަށް.

ބައްޕަ ބުނީ ފުރަތަމަ ޙުކުމުގައި ވަކި ތަނެއް ޚާއްޞަ ނުކުރާތީ ތަންފީޛުގެ ޙުކުމުން ގެ ކަނޑައެޅުމަކީ ތަންފީޛެއް ނޫންކަމަށާއި، ކުއްޔަށް ހިފި ތަނާއި ކުލި ދިނުމަށް ތައްޔާރުކަމާއި ގޭގައި މަސްލަޙަތު ގެއްލޭނެކަމަށް ރިޢާޔަތްނުކުރިކަމަށާއި، ހެއްކެއްނެތި މަންމަގެ ބަހަށް ބިނާކޮށް ނިންމިކަމަށް.

ދަރިން ދިރިއުޅޭނެ ތަނެއް ދެއްކުމަށް ކުރެވިފައިވާ ޙުކުމެއް ތަންފީޛުކުރުމުގައި، ބައްޕަގެ ވަކި ގެއެއްގައި ތަނެއް ދައްކަން ފެމިލީ ކޯޓުން އެންގުމަކީ ޙުކުމާ އެއްގޮތް، ފަރާތްތަކާއި ކުދިންގެ މަސްލަޙަތަށް ރިޢާޔަތްކުރެވިފައިވާ ނިންމުމެއްތޯ.

ބައެއް ބަދަލުކުރި (ވަކި ގެއެއްގައި ތަނެއް ދެއްކުމަށް އެންގި ބައި ބާޠިލުކޮށް، މަހަކު 12,500ރ. ކުލި ދައްކަން ކަނޑައެޅި)

ޢާއިލާއާބެހޭ ޤާނޫނުގެ 38 ވަނަ މާއްދާގެ ދަށުން ތަނެއް ދެއްކުމަކީ ބައްޕަގެ ޒިންމާއެއް ނަމަވެސް، ދެފަރާތާއި ކުދިންގެ މަސްލަޙަތަށް ބަލާއިރު ބައްޕަގެ ގެއަށް ވެއްދުމާއި 1 ކޮޓަރީގެ ތަނަކީ އެކަށީގެންވާ ޙައްލެއް ނޫންކަމަށާއި، އެންމެ މަސްލަޙަތު ހުރި ޙައްލަކީ މާލޭގެ ކުލީގެ ރޭޓަށް ބަލައި ކުލީގެ ފައިސާ ދިނުންކަމަށް.