ޝަމީޒްލޯ ލޫކާޒް ސިޒްކޯ ވ. ސްކޫބާ ސްޕާ ޕވޓ ލޓޑ

ސިވިލް ކޯޓުން ވަގުތީ އަމުރު ނުނެރުމަށް ނިންމީ، އަމުރަށް އެދުން ލަސްވެފައިވާތީއާއި، ބޯޑުން ހެޔޮނިޔަތުގައި ނިންމާ ނިންމުންތަކުގެ ތެރެއަށް ކޯޓު ނުވަނުމުގެ އުޞޫލާއި، ގެއްލުމަކީ ފައިސާއިން ފުއްދޭ ގެއްލުމަކަށްވުމާއި، އިޢާދަ ނުކުރެވޭ ގެއްލުން ބަޔާންކޮށްދެވިފައި ނުވާތީއެވެ.

ސްކޫބާ ސްޕާ ޕްރައިވެޓް ލިމިޓެޑްގެ މައިނޯރިޓީ ހިއްސާދާރުން، މެޖޯރިޓީ ހިއްސާދާރުން އެމީހުންގެ ޙައްޤުތައް ނިގުޅައިގަނެ ކުންފުނީގެ ގަވާއިދާ ޚިލާފަށް ޖަލްސާ ބާއްވާކަމަށް ބުނެ ސިވިލް ކޯޓުގައި ދަޢުވާކޮށް، ކުންފުނީގެ ހަމައެކަނި ހަރުމުދާ ކަމަށްވާ "ޔިންގ" ސަފާރީ ބޯޓު ވިއްކުން ހުއްޓުވުމަށް ވަގުތީ އަމުރަށް އެދުނެވެ.

އިސްތިއުނާފުކުރި ފަރާތްތަކުން ބުނީ ބޯޓު ވިއްކައިފިނަމަ ޙުކުމު ތަންފީޛުކުރެވިދާނެ ގޮތެއް ނުވާނެ ކަމަށާއި، އަމުރަށް އެދުން ލަސްވެފައި ނުވާކަމަށެވެ. ރައްދުވި ފަރާތުން ބުނީ ވަގުތީ އަމުރުން އަސްލު ދަޢުވާގެ ފަރުވާ ކުރިއާލައި ދެވޭނެ ކަމަށާއި، ގެއްލުމަކީ ފައިސާއިން އަގުކުރެވޭ ގެއްލުމެއް ކަމަށާއި، ކުންފުންޏަށް ލިބޭ ގެއްލުން ބޮޑުކަމަށެވެ.

ކުންފުނީގެ މައިނޯރިޓީ ހިއްސާދާރުން ހުށަހެޅި ދަޢުވާއެއްގެ ތެރެއިން، ކުންފުނީގެ ހަމައެކަނި ހަރުމުދާ ކަމަށްވާ ސަފާރީ ބޯޓު ވިއްކުން ހުއްޓުވުމަށް ވަގުތީ އަމުރު ނުނެރުމަށް ސިވިލް ކޯޓުން ނިންމި ނިންމުމަކީ ސުޕްރީމް ކޯޓުގެ 2012/SC-A/21 ޤަޟިއްޔާގެ ޝަރުޠުތަކާއި ޝަރީޢަތްކުރުމާބެހޭ ގަވާއިދު 6 އާ އެއްގޮތަށް ނިންމި ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

އަސްލު ދަޢުވާއަކީ ބޯޓު ވިއްކުމާ ގުޅޭ ދަޢުވާއެއް ނޫންކަމުން ވަގުތީ އަމުރުން ޙިމާޔަތްކުރަންޖެހޭ މައުޟޫޢީ ޙައްޤެއް ފާޅުކަން ބޮޑުކޮށް ނުފެނެއެވެ. އަމުރު ނުނެރުމުން ޙުކުމުގެ މަޤްޞަދު ޙާޞިލުނުވާނެކަމާއި އިޢާދަ ނުކުރެވޭ ގެއްލުމެއް ލިބޭނެކަން ނުފެނެއެވެ. ވިއްކަން ނިންމި ކަން ދަޢުވާ ހުށަހެޅިއިރުވެސް އެނގިހުރުމުން އަމުރަށް އެދުން ލަސްވެފައިވާކަމަށް ސިވިލް ކޯޓުން ނިންމީ ރަނގަޅަށެވެ.