ސީއެންޑް ސަން މޯލްޑިވްސް ޕްރައިވެޓް ލިމިޓެޑް ވ. އިމާދު ޔޫސުފް

އެއްބަސްވުމުގެ ދަށުން ކުރެވުނު މުޢާމަލާތްތައް ހިނގީ ސީދާ ބައްޕައާއެކު ކަމަށާއި، ދަޢުވާލިބުނު ފަރާތުގެ ބައިވެރިވުމެއް ނުވަތަ އިހުމާލެއް ސާބިތުނުވާތީ، ބައްޕައާ ހަވާލުކުރި ތަކެއްޗަށް އޭނާ ޒިންމާވާންޖެހޭ ސަބަބެއް ނެތްކަމަށް ސިވިލް ކޯޓުން ޙުކުމްކުރި.

90 ފޫޓުގެ ފައިބަރގްލާސް މަސްދޯންޏެއް ބަނުމަށް 2007 ގައި ވެވުނު އެއްބަސްވުމުގެ ދަށުން ކުންފުނިން ފޯރުކޮށްދިން ފައިބަރގްލާސް މެޓީރިއަލް، ދަޢުވާލިބުނު ފަރާތުގެ އެދުމުގެ މަތިން އޭނާގެ ބައްޕައާ ހަވާލުކުރި ނަމަވެސް ދޯނި ބަދެ ނުދީ ތަކެތި ވިއްކާލި ކަމަށް ބުނެ، ތަކެތީގެ އަގާއި ގެއްލުމުގެ ބަދަލު ހޯދުމަށް ކުންފުނިން ދަޢުވާކުރި.

އިސްތިއުނާފުކުރި ކުންފުނިން ބުނީ ސިވިލް ކޯޓުން ހެކިބަހަށް ބައްލަވާފައި ނުވާކަމަށާއި، ކޮންޓްރެކްޓާބެހޭ ޤާނޫނުގެ އުޞޫލުތަކަށް ބައްލަވާފައިނުވާކަމަށެވެ.

އެއްބަސްވުމުގެ ދަށުން ދޯނި ބަނުމަށް ފޯރުކޮށްދޭން އެއްބަސްވި ތަކެތި، އެއްބަސްވި ފަރާތުގެ އެދުމުގެ މަތިން އޭނާގެ ބައްޕައާ ހަވާލުކުރުމުން، އެއްބަސްވުމާ އެއްގޮތަށް އެ ފަރާތާ ހަވާލުކުރެވުނީކަމުގައި ބެލެވޭނެތޯއާއި، އެ ތަކެއްޗަށާއި އެއްބަސްވުމާ ޚިލާފުވުމުން ލިބުނު ގެއްލުމަށް އެ ފަރާތް ޒިންމާވާންޖެހޭނެތޯ.

ދަށުކޯޓުގެ ޙުކުމް ބާޠިލު؛ ދަޢުވާލިބުނު ފަރާތް ތަކެއްޗަށާއި ގެއްލުމަށް ޒިންމާވާންޖެހޭކަމަށް ކަނޑައަޅައި، ފައިސާގެ މިންވަރު ސިވިލް ކޯޓަށް ހުށަހަޅައިގެން ކަނޑައަޅަންޖެހޭކަމަށް ނިންމި

ތަކެތި ބައްޕައާ ހަވާލުކުރީ ދަޢުވާލިބުނު ފަރާތުގެ އެދުމުގެ މަތިން، އޭނާއަށް އެނގިގެން ކަމަށް ހެކިބަހުން ސާބިތުވާތީ، އެއްބަސްވުމާ އެއްގޮތަށް އޭނާ ތަކެއްޗާ ހަވާލުވީ ކަމަށް ބެލެވޭނެ ކަމަށާއި، ކަނޑައަޅައި ދައްކާ ފަރާތަކާ ހަވާލުކުރުމަކީ އެއްބަސްވުމާ އެއްގޮތަށް ހަވާލުކުރުން ކަމަށާއި، އެހެންކަމުން ތަކެއްޗަށާއި ގެއްލުމަށް އޭނާ ޒިންމާވާންޖެހޭކަމަށް ހައިކޯޓުން ކަނޑައެޅި.