ރިޒްމީނާ ވ. އެންޓި-ކޮރަޕްޝަން ކޮމިޝަން

ވަޒީފާއާބެހޭ ޓްރައިބިއުނަލުން ސެކްރެޓަރީ ޖެނެރަލަށް ކޮމިޝަން ތަމްޘީލުކުރުމުގެ ހުރަހެއް ނެތްކަމަށް އިޖުރާއީ ގޮތުން ނިންމައި، ވަކިކުރީ އެކަށީގެންވާ ސަބަބެއް އޮވެ، މައުޟޫޢީ އަދި އިޖުރާއީ ޢަދުލުވެރިކަން ޤާއިމުކޮށްކަމަށް ނިންމިއެވެ.

އެންޓި-ކޮރަޕްޝަން ކޮމިޝަނުގެ އިންވެސްޓިގޭޝަން އޮފިސަރ ގްރޭޑް 1 ގެ މަޤާމުގައި ހުރި މުވައްޒަފަކު، މުވައްޒަފުންގެ ވައިބަރ ގްރޫޕެއްގައި ކޮރަޕްޝަނާ ދެކޮޅު ދެ ޝުޢޫރެއް ޕޯސްޓްކުރުމުން، އިންޒާރެއް ނުދީ 14 ޑިސެންބަރު 2017 ގައި ވަޒީފާއިން ވަކިކުރެވުނެވެ.

އިސްތިއުނާފުކުރާ ފަރާތުން ބުނީ ހެކިބަސް ހުށަހެޅި ވަކީލަކަށް ތަމްޘީލު ނުކުރެވޭނެކަމަށާއި، ޕޯސްޓްތަކުގެ ސަބަބުން ގެއްލުމެއް ސާބިތުނުވާކަމަށާއި، އެޕްރައިސަލްތަކަށް ރިޢާޔަތް ނުކުރާކަމަށެވެ. ކޮމިޝަނުން ބުނީ ޕޯސްޓްތަކުން ކޮމިޝަނުގެ މެންބަރުންނާމެދު ގޯސް ތަޞައްވުރެއް އުފެދޭކަމަށާއި، 2010/HC-A/208 ގެ ދެ ޝަރުޠު ފުރިހަމަވާކަމަށެވެ.

ޓްރައިބިއުނަލުގައި މުއައްސަސާ ތަމްޘީލުކުރީ ހެކިބަސް ހުށަހެޅުނު ޤާނޫނީ ވަކީލަކު ކަމުގައިވުމުގެ އިޖުރާއީ ޢައިބުގެ ނަތީޖާއާއި، ވައިބަރ ގްރޫޕެއްގައި ޝުޢޫރު ޕޯސްޓްކުރުމުގެ ސަބަބުން ނޯޓިސް ނުދީ ވަޒީފާއިން ވަކިކުރުމަކީ ވަޒީފާއާބެހޭ ޤާނޫނުގެ 23 ވަނަ މާއްދާއާ އެއްގޮތްވާ، އެކަށީގެންވާ ސަބަބެއް އޮވެ ކުރި ވަކިކުރުމެއްތޯ.

ޓްރައިބިއުނަލުގެ ނިންމުން ބާޠިލު، ވަޒީފާއަށް ރުޖޫޢަކުރުމުގެ ފުރުޞަތާއި މުސާރަ ލިބިދިނުމަށް އަމުރު

ހެކިބަސް ހުށަހެޅި ވަކީލަކު ތަމްޘީލުކުރުމަކީ ޢައިބެއް ނަމަވެސް ގެއްލުމެއް ނުވާތީ އެއީ ބާޠިލުކުރާ ސަބަބެއް ނޫނެވެ. ޝުޢޫރުތަކަކީ ފާޅުކަންބޮޑު ޣައިރު ސުލޫކީ ޢަމަލެއް ނުވަތަ ޚިޔާނާތެއް ނޫންކަމުން ނޯޓިސް ނުދީ ވަކިކުރުމަކީ ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 23 ވަނަ މާއްދާއާ ޚިލާފު، މައުޟޫޢީ ޢަދުލުވެރިކަން ނެތް ވަކިކުރުމެކެވެ.