ޒީބާ ޢަޠާ މުޙައްމަދު ވ. އެންޓި-ކޮރަޕްޝަން ކޮމިޝަން

ވަޒީފާއާބެހޭ ޓްރައިބިއުނަލުން ނިންމީ، ވަޒީފާއިން ވަކިކުރެވިފައިވަނީ އެކަށީގެންވާ ސަބަބެއް އޮވެ މަޢުޟޫޢީ ޢަދުލުވެރިކަމާއި އިޖުރާއީ ޢަދުލުވެރިކަން ޤާއިމުކުރުމަށްފަހުކަމަށް ކަނޑައަޅައި، އެދިފައިވާ އަމުރުތައް ނުކުރުމަށެވެ.

އެންޓި-ކޮރަޕްޝަން ކޮމިޝަނުގައި 2006 އިން ފެށިގެން ވަޒީފާ އަދާކުރި އިންވެސްޓިގޭޝަން އޮފިސަރަކު، ސީނިއަރ އިންވެސްޓިގޭޝަން އޮފިސަރުގެ މަޤާމުގެ ޝަރުޠުތަކާ މެދު މުވައްޒަފުންގެ ވައިބަރ ގްރޫޕުގައި ކަންބޮޑުވުން ފާޅުކުރުމުން، މަސައްކަތުގެ އަޚްލާޤު އެކަށީގެން ނުވާކަމަށާއި ވަޒީފާގައި ބެހެއްޓުމަކީ ކޮމިޝަނަށް ގެއްލުންވާނެ ކަމެއްކަމަށް ބުނެ 14 ޑިސެންބަރު 2017 ގައި ވަޒީފާއިން ވަކިކުރި.

އިސްތިއުނާފުކުރި ފަރާތުން ބުނީ، ޓްރައިބިއުނަލްގެ ނިންމުމަކީ ހައިކޯޓުގެ 2011/HC-A/134 އާއި 2016/HC-A/68 ގައި ކަނޑައަޅާފައިވާ އުޞޫލުތަކާ ޚިލާފުކޮށް ޤާނޫނުއަސާސީގެ 143 (ރ) އާ ޚިލާފު ނިންމުމެއް ކަމަށާއި، ކޮމިޝަނުގެ ގަވާއިދުގެ 44 ވަނަ މާއްދާގެ އިޞްލާޙީ ފިޔަވަޅު ނާޅާ ވަކިކުރުމަށް ޓްރައިބިއުނަލުން ރިޢާޔަތް ނުކުރި ކަމަށެވެ.

އެންޓި-ކޮރަޕްޝަން ކޮމިޝަނުގެ މުވައްޒަފަކު، ވަޒީފާއިން ވަކިކުރުމުގެ ސަބަބަކަށް ވައިބަރ ގްރޫޕެއްގައި ފާޅުކުރި ޚިޔާލާއި ތުހުމަތު ދިފާޢުކުރަމުން ދެއްކި ވާހަކަ ހެދި، ވަޒީފާއާބެހޭ ޤާނޫނުގެ 23 ވަނަ މާއްދާއާއި ކޮމިޝަނުގެ ގަވާއިދުގެ 47 ވަނަ މާއްދާގެ (ހ) ގެ ދަށުން ނޯޓިހެއް ނުދީ ވަޒީފާއިން ވަކިކުރުމަކީ އެކަށީގެންވާ ސަބަބެއް އޮވެ ކުރެވުނު ކަމެއްތޯ ނުވަތަ ނޫންތޯ.

ޓްރައިބިއުނަލްގެ ނިންމުމަށް ބަދަލު ގެނެސް، ވަޒީފާއިން ވަކިކުރީ ޤާނޫނާ ޚިލާފަށްކަމަށް ކަނޑައަޅައި، ވަޒީފާއަށް ރުޖޫޢަވުމުގެ ފުރުޞަތު ހަމަޖައްސައިދިނުމަށް ނިންމި

ވަކިކުރުން ބިނާވެފައިވަނީ ހަމައެކަނި ވައިބަރ ގްރޫޕުގައި ފާޅުކުރި ޚިޔާލާއި ތުހުމަތު ދިފާޢުކުރަމުން ދެއްކި ވާހަކައިގެ މައްޗަށް ކަމަށާއި، މުވައްޒަފުގެ ކަންބޮޑުވުން ޙަޤީޤަތެއްތޯ ބަލާނެ އިޢުލާނާއި ގަވާއިދު ހުށަހަޅާފައި ނުވާކަމަށާއި، ސުލޫކަށް 100 ޕޮއިންޓް ލިބިފައިވާ ކަމަށާއި، ގަވާއިދުގެ 44 އާއި 45 ވަނަ މާއްދާގެ ތަރުތީބަށް ޢަމަލު ނުކުރާ ކަމަށް ބަލައި، ވަކިކުރީ އެކަށީގެންވާ ސަބަބެއް ނެތިކަމަށް ކަނޑައެޅި.