އަޙްމަދު ސުހައިލް މޫސާ ވ. ޕްރޮސިކިއުޓަރ ޖެނެރަލް

ބަންދާމެދު ގޮތެއް ނިންމުމަށް ހުށަހެޅުމުން، މުޖުތަމަޢުގެ ސަލާމަތާއި ރައްކާތެރިކަމަށްޓަކައި 5 ދުވަހަށް ކަސްޓޯޑިއަލް ޖަލެއްގައި ބަންދުގައި ބެހެއްޓުމަށް ކްރިމިނަލް ކޯޓުން އަމުރުކުރިއެވެ.

ބޭންކަކަށް ޖަމާކުރަން ގެންދިޔަ ފައިސާ ދަބަހެއް ފޭރިގަތް މައްސަލައެއްގައި ތުހުމަތުކުރެވޭ ފަރާތް ކޯޓު އަމުރަކާ ނުލައި ހައްޔަރުކުރުމުން ކްރިމިނަލް ކޯޓުން ދޫކޮށްލި ނަމަވެސް، އެ ދުވަހު ފުލުހުން ހައްޔަރުކުރުމުގެ އަމުރަކަށް އެދި، އަމުރުގެ ދަށުން އަލުން ހައްޔަރުކުރެވުނެވެ.

އިސްތިއުނާފުކުރި ފަރާތުން ބުނީ އަމުރަކީ މުއްތަހަމުގެ ޙައްޤުތަކާ ޚިލާފު، ދެ ފަހަރަށް ހައްޔަރުކުރިކަމަށް ރިޢާޔަތްނުކުރާ، ރެސް ޖުޑިކާޓާ އާއި ޑަބަލް ޖެޕަޑީ ގެ މަބްދަޢުތަކާއި ކޯޓުތަކުގެ ޤާނޫނާއި ޤާނޫނުއަސާސީގެ 143 (ރ) އާ ޚިލާފު އަމުރެއް ކަމަށެވެ.

ފޭރުމުގެ ތުހުމަތުގައި ހައްޔަރުކުރެވުނު މީހަކު 5 ދުވަހަށް ބަންދުގައި ބެހެއްޓުމަށް ކްރިމިނަލް ކޯޓުން ނެރުނު އަމުރަކީ މުއްތަހަމުގެ ޙައްޤުތަކާއި، "ރެސް ޖުޑިކާޓާ" އާއި "ޑަބަލް ޖެޕަޑީ" ގެ މަބްދަޢުތަކާއި، ބަންދާމެދު ގޮތެއް ނިންމުމުގެ ޤާނޫނީ ހަމަތަކާ ޚިލާފު އަމުރެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

އަމުރު ނެރުނީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 41 ވަނަ މާއްދާގެ ދަށުން ކޯޓު އަމުރަކުން ހައްޔަރުކުރުމަށްފަހު ކަމުން ޚިލާފުވި އިޖުރާއަތު ސާފުކޮށްދީފައި ނުވެއެވެ. ރެސް ޖުޑިކާޓާ އާއި ޑަބަލް ޖެޕަޑީ ބަންދުގެ އަމުރަށް ތަޠުބީޤުވާކަން ދައްކާފައި ނުވެއެވެ. ތުހުމަތަކީ ބޮޑެތި ކުށެއް ކަމާއި ތުހުމަތުކުރެވޭ މިންވަރަށް ހެކި ހުށަހެޅިފައިވާތީ މުޖުތަމަޢުގެ ސަލާމަތަށްޓަކައި ބަންދުކުރުން ޤާނޫނާ އެއްގޮތެވެ.