ޕްރޮސިކިއުޓަރ ޖެނެރަލް ވ. ނަން ސިއްރުކުރެވިފައި

މެޑިކަލް އެގްޒެމިނޭޝަނަށް އަމުރުކޮށް، ހޮސްޕިޓަލުގެ ދެ ލިޔުމާއި ޑޮކްޓަރުގެ ހެކިބަހަށް ބިނާކޮށް، ދަޢުވާ ލިބޭ ފަރާތަކީ ދަޢުވާ ލިބިގަތުމަށް ނުކުޅެދިގެންވާ މީހެއްކަމަށް ނިންމިއެވެ.

ކުޑަކުއްޖަކާ ގުޅޭ ޖިންސީ ކުށުގެ ދެ ދަޢުވާއެއް ތުހުމަތުކުރެވޭ ފަރާތުގެ މައްޗަށް ކުރުމުން، ދަޢުވާ ލިބޭ ފަރާތަކީ އިންޓެލެކްޗުއަލް ޑިސްއެބިލިޓީ ހުރި މީހެއްކަމަށާއި ދަޢުވާ ލިބިގަތުމަށް ނުކުޅެދޭކަމަށް ދިފާޢު ހުށަހެޅިއެވެ.

ދައުލަތުން ބުނީ ޚަބީރު ބުނި ސައިކޮލޮޖިކަލް އެސެސްމަންޓް ރިޕޯޓު ނެތި ނިންމީ ކަމަށާއި ބަލި ހުރި މިންވަރު ނޭނގޭ ކަމަށެވެ. ރައްދުވި ފަރާތުން ބުނީ އެގްޒެމިނޭޝަން ހަދައި ޚަބީރުގެ ހެކިބަސް ނަގައި ދެފަރާތަށް ފުރުޞަތު ލިބިފައިވާ ކަމަށެވެ.

ދަޢުވާ ލިބޭ ފަރާތަކީ ދަޢުވާ ލިބިގަތުމަށް ނުކުޅެދިގެންވާ މީހެއްކަމަށް ދަށުކޯޓުން ނިންމީ ޚަބީރެއްގެ ސައިކޮލޮޖިކަލް އެސެސްމަންޓް ނެތި، ޖިނާއީ އިޖުރާއަތުގެ ޤާނޫނުގެ 121 ވަނަ މާއްދާއާ ޚިލާފަށްތޯ.

އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ހޮސްޕިޓަލުގެ ލިޔުންތަކަކީ ކޯޓު އަމުރާ ގުޅިގެން ހެދި އެގްޒެމިނޭޝަނުގެ ހޯދުންތަކާއި ސައިކޮލޮޖިކަލް އެސެސްމަންޓް ހިމެނޭ ލިޔުންތަކެއްކަމަށާއި، ސައިކައިޓްރިސްޓަކު ހެކިބަސް ދީފައިވާތީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 121 ވަނަ މާއްދާއާ ޚިލާފު ކަމެއް ނުވާކަމަށް ކޯޓުން ކަނޑައެޅިއެވެ.