ޕްރޮސިކިއުޓަރ ޖެނެރަލް ވ. ނަމާއި އެޑްރެސް ސިއްރު ކުރެވިފައި

ޖުވެނައިލް ކޯޓުން ކަނޑައެޅީ ދަޢުވާ ޤާނޫނުއަސާސީގެ 51 ވަނަ މާއްދާގެ (އ) ގައިވާ އެކަށީގެންވާ ޝައްކެއް ނެތް މިންވަރަށް ސާބިތުނުވާ ކަމަށެވެ.

ކުޑަކުއްޖަކު ދުއްވި ސައިކަލެއްގެ ފަހަތަށް، ޕިކަޕެއްގައި އިން މީހަކަށް ތޫނު އެއްޗަކުން ޙަމަލާދިން މީހަކު އަރުވައިގެން ހާދިސާ ހިނގި ސަރަޙައްދު ދޫކޮށް ދިޔަކަމަށް ބުނެ، ތޫނު އެއްޗެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ދަޢުވާ ޖުވެނައިލް ކޯޓުގައި އުފުލިއެވެ.

ދައުލަތުން ބުނީ ސިއްރު ހެކިވެރިޔާގެ ބަހާއި، އޭނާ ތުހުމަތުކުރެވޭ ފަރާތް ފާހަގަކުރި ލިޔުމާއި، ސީސީޓީވީ ފުޓޭޖާއި، 6 ޚާއްޞަ ސިފަ ދިމާވާކަމަށް ބުނާ އެނަލިސިސް ރިޕޯޓުން ދަޢުވާ ސާބިތުވާ ކަމަށެވެ. ރައްދުވާ ފަރާތުން ބުނީ ރިޕޯޓަކީ ވާގިދޭ ހެކި ނެތި އެކަނި ކުށް ސާބިތުކުރެވޭނެ ހެއްކެއް ނޫން ކަމަށާއި، ހެކިވެރިޔާ ޝަރީޢަތުގައި ބުނީ ތުހުމަތުކުރެވޭ ފަރާތް ނުފެނޭ ކަމަށާއި، ފުޓޭޖުން މޫނު ސާފުކޮށް ނުފެނޭ ކަމަށެވެ.

މީހަކަށް ނުރައްކާތެރި ހާނީއްކައެއްވާ ގޮތަށް ތޫނު އެއްޗެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ދަޢުވާ (ޤާނޫނު ނަންބަރު 17/2010 ގެ 8 ވަނަ މާއްދާގެ (ނ) އަދި (ރ)) ކުޑަކުއްޖެއްގެ މައްޗަށް، ސިއްރު ހެކިވެރިއެއްގެ ބަހާއި ވީޑިއޯ ފުޓޭޖާއި ފުލުހުންގެ ވީޑިއޯ އެނަލިސިސް ރިޕޯޓުން ޤާނޫނުއަސާސީގެ 51 ވަނަ މާއްދާގެ (އ) ގައިވާ އެކަށީގެންވާ ޝައްކެއް ނެތް މިންވަރަށް ސާބިތުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (ދަޢުވާ ސާބިތުނުވާކަމަށް)

ހެކިވެރިޔާގެ ތަޙުޤީޤު ބަޔާނާއި ފޮޓޯ ސެޓަކީ ވަކި ހެއްކެއް ނޫނެވެ؛ ފުޓޭޖާއި ރިޕޯޓާއި ރިޕޯޓު ތައްޔާރުކުރި ފަރާތުގެ ބަހަކީ ގުޅިފައިވާ ޤަރީނާއެކެވެ؛ ހެކިވެރިޔާ ޝަރީޢަތުގައި ތުހުމަތުކުރެވޭ ފަރާތް ޔަޤީނުން ނުދެނެގަނެއެވެ. ހަމައެކަނި ޤަރީނާއަކުން ޖިނާއީ ދަޢުވާއެއް ސާބިތުނުވާތީ ޖުވެނައިލް ކޯޓުގެ ޙުކުމަށް ބަދަލު ގެންނަންޖެހޭ ސަބަބެއް ނެތެވެ.