އަޙްމަދު ފަޔާޟް ޢަލީ ރިޟާ ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ތިން ތުހުމަތުކުރެވޭ ފަރާތުގެ މައްޗަށް ކުށް ސާބިތުކޮށް، އިސްތިއުނާފުކުރި ފަރާތަށް 2 އަހަރުގެ ޖަލު ޙުކުމް ކުރިއެވެ.

ރިޔާސީ ލޯންޗު 'ފިނިފެންމާ' ގައި 28 ސެޕްޓެމްބަރު 2015 ގައި ހިނގި ގޮވުމުގެ ޙާދިސާއަށްފަހު، އެސަރަޙައްދުގެ ކޮންޓްރޯލް ނަގައި ކުށުގެ ވެށި ރައްކާތެރިކުރުމަށް ފިޔަވަޅު ނާޅައި، އޭނާގެ އަމުރަށް އެހެން ދެމީހަކު ލޯންޗުން ހެކި ކަމުގައި ބޭނުންކުރެވިދާނެ ތަކެތި ނަގައިގެން ގެންދިޔަކަމަށް ބުނެ އިސްތިއުނާފުކުރި ފަރާތުގެ މައްޗަށް 530 (ހ) (2) ގެ ދަށުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ 530 (ހ) (2) ގެ ކޮން ޢަމަލެއް ކުރިކަން ބަޔާން ނުކުރާ ކަމާއި، އެހެން ސިފައިންވެސް އަމުރު ހިންގިކަމުގެ ހެކިބަހަށް ރިޢާޔަތް ނުކުރި ކަމާއި (2011/SC-A/34)، އަދަބުގައި 1104 (ރ) (3)، 1108 (ށ) އަދި 1109 އަށް ރިޢާޔަތް ނުކުރި ކަމާއި، ދިފާޢީ ހެކިން ހާޒިރުނުކުރީ ޤާނޫނުއަސާސީގެ 51 (އ) އާއި 2011/SC-A/36 އާ ޚިލާފަށް ކަމެވެ.

ކުށުގެ ވެށި ރައްކާތެރިކުރުމަށް ފިޔަވަޅު ނާޅައި، ވެށިން ތަކެތި ނެގުމަށް އެހެން މީހުންނަށް އަމުރުކުރުމަކީ ޤާނޫނުލްޢުޤޫބާތުގެ 530 ވަނަ މާއްދާގެ (ހ) ގެ (2) ގެ ދަށުން ޢަދުލު އިންސާފު ޤާއިމުކުރުމަށް ހުރަސްއެޅުމުގެ ކުށެއްގެ ގޮތުގައި ސާބިތުވޭތޯ؛ އަދި ހެކި ވަޒަންކުރުމާއި ދިފާޢީ ހެކިން ހާޒިރުނުކުރުމާއި އަދަބު ކަނޑައެޅުމުގައި ޤާނޫނާ އެއްގޮތަށް ޢަމަލުކޮށްފައިވޭތޯ.

ދަށުކޯޓުގެ ޙުކުމް (އިސްތިއުނާފުކުރި ފަރާތާބެހޭ ބައި) ބާޠިލު

އަޣުލަބިއްޔަތުގެ ރައުޔުގައި 530 (ހ) (2) ގެ ޢަމަލެއް އޭނާ ކުރިކަމެއް ނުވަތަ އަމުރުކުރިކަމެއް ހެކިވެރިއަކު ނުބުނާތީ ކުށް ސާބިތުނުވާކަމަށާއި، އަދަބުގައި 1108 (ށ) އާއި 1109 އަށް ރިޢާޔަތްކޮށްފައި ނުވާކަމަށް ފާހަގަކުރިއެވެ. ފަނޑިޔާރު ނިޔާޒުގެ ރައުޔުގައި ކުށުގެ ޢަމަލު ފުރިހަމަވަނީ އަމިއްލައަށް ކުރުމުން ކަމުން އެއީ އެ މާއްދާގެ ދަށުން ކުރެވިދާނެ ދަޢުވާއެއް ނޫންކަމަށެވެ.